25 June 2025: Vawiin chawhma khan ICT Minister Dr Vanlalthlana chuan a Pisa-ah Chanchinbumite a kawm a, lehkha hmanga file system kalpui mek thlakna tur E-Office kalpui tan a nih chungchang te leh Sawrkar Department Website hman mek te tha zawka siam hna thawh mek a nih chungchang te a sawifiah.
Dr Vanlalthlana, ICT Minister chuan, Mizoram Sawrkar chuan chak zawk leh lang tlang zawka sawrkar file-te a kal theihna turin eOffice hman ṭha a ti a, January 2024 aṭang khan hma lak ṭan a ni, a ti. A bul ṭanna (pilot) atan Secreteriat tih hmasak a, chumi zawha Directorate leh District Office-ah te kalpui tura ruahman ni, a ti a. eOffice hi April ni 18, 2025-ah ‘Go-Live’ niin hman ṭan a lo ni ta a, a tirah Secretariat-a Department thlan bik pali, DPAR(GGT), ICT, School Education leh PWD-ten an hmang hmasa a, tunah chuan, Secretariat-a Department zawng zawng (41) bakah Chief Minister Office (CMO)-ah te hman a ni tawh a ni, a ti.
ICT Minister chuan, eOffice hmang hian file 6,492 kaltir niin heng file-te hi vawi 63,565 khawih chet tawh a ni, a ti. File kal hi a chakin a awm reina dawhkan hmuh theih vek a nih avangin tu mahin file an kawl rei ngai lo a tih theih, a ti a. File bo a awm theih tawh lo bakah, file ken kual a awm tawh loh avangin confidentiality atan pawh a ṭangkai em em a, lehkhapuan hman a tlem tawh dawn avangin sawrkarin sum tam tak a hum thei dawn bawk a ni, a ti.
