Leiminna hmunah YMA Sub Hqrs Lunglei hruaitute

09 July 2026: Tunhnai Ruahsur nasa avanga leimin avanga inkalpawhna kawngpui pawimawh enin YMA Sub-Headquarters Lunglei hruaitute vawiin khan an che chhuak a, YMA Bualte Branch hnenah a tula hman tur tanpuina an hlan.

Chhim lam District – Siaha leh Lawngtlai pan tur leh Hmar lam pan tur khualzinte tan thinna Bualte dai leimin avangin khualzin tangkhangte buaipuiin Bualte khawtlang an buai leh mek a, an dinhmun leh hmalaknate enpui turin YMA Sub-Hqrs Lunglei hruaitute hi an kal a ni.

Vawiin khan Bualte leiminna karah mi tlawmngaite’n Lawngtlai lama kalpui tur mitthi an zawn kai a ni.

Pu C.Lalrindika, Secretary YMA Sub-Hqrs chuan kum liam ta atanga Bualte khawtlangin khualzin tangkhang leh lirthei khalhtu lei min avanga an lo buaipui tawh dan chu Mizo mipui mai ni lo, news outlet leh social media kaltlangin ramchhung hmun dangah pawh Mizote’n kan hmingthat phah hle a ni, a ti.

YMA Sub-hqrs Lunglei hruaitute, VCP Bualte, Group leh Branch YMA Hruaitute leh Incident Commander Pi Lalremdiki Sailo, SDPO Pu Lalthankima te bakah helai tangkhang mipawimawhte nen thukhawmin, tangkhangte dawnsawn dan bakah District thuneituten kawng khar chungchanga ruahmanna te sawiho a ni.

Tun dinhmunah Bualte ah hian kawngchhia avanga tangkhang 300 chuang, Thaizawlah mi 70 vel awmin Hrangchalkawnah Chhim lam pan turte tana dan anih bawk avangin tangkhang an awm tan mek bawk.

YMA Sub-Hqrs Lunglei hruaitute hian khualzin tangkhang leh leimin kaihnawiha ruahmanna awm theite Thaizawl Branch hruaitute, Hrangchalkawn Branch leh YMA Theiriat Branch hruaitute nen an sawiho bawk. Central YMA atangin Bualte Branch – Rs.10,000 leh Thaizawl Branch – Rs.5000 hlan an ni bawk.