22 May 2024: Chief Medical Office Lunglei buatsaihin vawiin khan World TB Day 2024 leh TB Free Village Ceremonial Function, DEO Conference Hall Lungleiah hman a ni.
Inkhawm hi Dr.Lalrinthangi, Dy.CMO Lunglei chuan kaihruaiin Rev.Lalrinliana BCM Chanmari Pastor bialin hunserh a hmang a. He hun hmanpuitu leh khuallian ni bawk Lunglei D.C, Pi Ramdinliani chuan undivided Lunglei Dist chu a area anga zawng chuan Mizorama District zau ber anih avangin in kalpawhna kawngah te, hriselna kawnga hmalakna kawngah te hmalak a harsa bik em em a, Dist dangte nen chuan khaikhin chi pawh a nih loh laia TB Free Village nei tam ber kan ni thei chu thawktute inpekna leh khawtlang hruaitute hmalakna a fakawm hle a ni a ti.
D.C chuan India ram pawh khawvela TB natna vei awm tamna pawl a ni a, amaherawh chu Sawrkarin theihtawpin hma a la a, zawi zawiin hman kan sawn zel a ni tiin kum 2025 ah chuan India ramin TB umbo tumin theihtawp a chhuah mek a ni a ti. TB natna umbo tura Department hmalaknaah Lunglei Dist a khawtin hruaitute chu thawktute tha taka tawiawm thin tura chahin tunah TB Free Village lawmmman dawngtu khaw 18 te chu Lunglei Dist tana Meichher chhi engtu an ni tih inhre tur leh an thawhrimna chuan rah tha tak a chhuah ngei a beisei thu khuallian Pi Ramdinliani chuan a sawi bawk a ni.
He hunah hian Dr.K.Lalhmachhuana Dist TB Officer chuan report pein kum 2023 khan Mizoramah TB Free Village puang thei Dist pathum awmin Lunglei Dist chu a puang tam thei ber a ni a khaw 18 TB Free Village ah puan an ni a ti.
Vawiina TB Free Village lawmman dawngtute chu, Chhipphir, Bualpui ‘ V’, Sekhum, Mualthuam North, Sertlangpui, Serte, Thuampui, Vaisam, Chithar, Thrangte, Sairep, Belthei, Tarpho, Thualthu, Bualte, Kawlhawk, Zotuitlang leh Ralvawng khuate niin, Mahatma Ghandhi Statue ( Brone ) leh Certificate an dawng a, TB Free Village an nih zel chuan Silver leh Gold thlengin an dawng thei dawn a ni.
