24 Sept 2024: Ruahtui tla nasa avanga Lunglei khawpui chhung kawng chhe lutuk chu tunlaiin ngawrh taka siamthat hna thawh mek a ni.
Lunglei khawpui chhung kawng siam hna lo thawk tawhtu EL&TY Enterprise Lunglei-in PWD lam nen kawng an siam hun laia inremna an siam angin, khawpui chhung kawng siamthat hna chu kum 2025 February thleng anih thu PWD Road Division-I thawktute chuan sawiin, khawpui chhung kawng siam hna chu a rang lama thawk turin EL&TY Enterprise hi an hriattir tih an sawi.
Ruahtui a tlak deuh reng si avangin Contractor hian hna an thawk lawk theilo niin an sawi a, tunah khaw awm danin a zir tak deuh avangin kawngpui siam hna hi chhun leh zanah ngawrh takin an thawk mek tih an sawi a, ruah surin a tihbuai loh chuan tunkar chhung hian AOC atanga Kikawn thleng siam zawh hman an beisei thu Contractor lam chuan an sawi a ni.
