24 April 2025: Nimin khan Mizoram State Project Monitoring Committee (MSPMC) chuan an Secretary, Er Lalthanzuala Ralte kaihhruaiin Lunglei khawpui chhung leh a chhehvela hmasawnna hna thawh mek pali chu a hmunah kal chilhin an enfiah.
MSPMC Inspection Team-ah hian Secretary Er Lalthanzuala Ralte bakah, Er Valbuanga (Member), Er H. Laldintluanga (Member), Dr Laldinpuia (Member), Prof. Chawngsailova (Member), Pu Vannunmawia (PS to Vice Chairman) leh Pi Vanchhungi (Task Force, MSPMC) te an tel.
MSPMC Inspection Team hian Lunglei khawpui tui lakna, Tlawng luia Public Health Engineering Department (PHED) hnuaia AMRUT 2.0 sum cheng vaibelchhe 4.7 hmanga tui khuah, concrete gravity impounding dam siam mek chu tlawh hmasa berin, hna ṭhat leh ṭhat loh an enfiah a.
MSPMC Inspection Team hian Commerce & Industries (C&I) Department hnuaia Integrated Infrastructure Development Centre (IIDC) Pukpuia Promotion of MSMEs in NER & Sikkim Scheme kal tlanga cheng vaibelchhe 9.9796 senga Flatted Factory (factory space 24) sak mek te, UD&PA Dept hnuaia Lunglawn ram chhung Riangvai Thlanmual bula Non-Lapsable Central Pool of Resources kal tlanga cheng nuai 600 senga Lunglei Solid Waste Management Centre sak mek leh C&I Dept hnuaia PWD enkawla Lunglei Chanmari-a NEC sum cheng nuai 1,403.40 senga Lunglei Market & Trade Centre sak mekte tlawhin, an enfiah bawk.
Department official-te leh hna thawktute nen ṭha zawk leh chak zawka hna thawh a nih theih nana bawhzui tur thil pawimawh hrang hrangte an sawi ho a ni.
