Lunglei khawpuiah veng dang atanga an veng chhunga Vawk leh Vawksa lakluh khap tan
16 July 2024: Lunglei khawpui veng thenkhatah Vawkpul hri ASF hmuhchhuah a nih avangin, khawpui chhung veng hrang hranga khawtlang hruaitute chuan veng dang atanga an veng chhunga Vawk leh Vawksa lakluh an khap tan.
Lunglei khawpuiah hian hun rei tak Vawkpul hri a len loh hnuah tunhnai khan veng thenkhatah Vawkpul hri ASF hmuhchhuah niin; hri avanga Vawk thi pawh an awm nual tawh a, heng Vawkpul hri hmuhchhuahna vengte hi District Veterinary Officer Lunglei chuan Infected area; Vawk lakluh leh lakchhuah phallohna vengah a puang nghal a ni. Hetiang a nih avang hian Vawkpul hri la len lohna veng nia ngaih Lunglei khawpui chhunga veng thenkhatah chuan khawtlang hruaituten an veng chhungah veng dang atanga Vawk lakluh bakah vawksa hring leh vawksa rep lakluh pawh khapin; an veng atanga veng danga Vawk leh a sa lakchhuah pawh an khap bawk a ni.
Hetiang anih lai hian Lunglei khawpui chhung veng hrang hrang Vawkpul hri la len lohna vengah te chuan nitin mi thahnem tak vawk talh an awm reng thung a, vawksa leitu erawh a ni telin an tlakhniam bakah Vawk pum man leh Vawk note man pawh nasa takin a tlahniam mek a, Vawksa sattute pawhin nidang zawng aiin an buk tling hle tawh niin thudawnna chuan a sawi.
