Lunglei – Tlabung darkar 3 chhung-a thlen theih tura theihtawp chhuah turin hrilh

16 Feb 2024: Vawiin chawhnu khan Lunglei DC Pi Ramdinliani, Addl DC & CALA Pu Donny Lalruatsanga leh official dangte’n NH-302 kawng siam mek chu an tlawh a; BNR Construction leh NHIDCL hotute’n lo hmuakin; an hnathawh kal mek dan te an lo hrilhfiah.

Pachang khua-ah BNR Camp-ah meeting neih a ni a; hetah hian culvert siam chungchang a harsatna an tawh te, hnathawh kal mek chungchanga harsatna an neihte DC hnenah hian an lo thlen a. DC chuan Tlabung to Lunglei chu April thla tir atang chuan darkar 3-a thlen hman ngei theih turin theihtawp chhuah turin a hrilh a ni. Hei bakah hian Phairuangkai Lei siam mek a endik nghalin, hma lak zel dan tur a enpui a ni.

DC chuan hnathawh kal mekah hmasawnna tam tak a awm avangin lawmawm a tih thu a sawi bawk.