26 Sept 2024: Nihnih chhung awh tur BIND DD Mizoram Indigeneous Games 2024 Inter Branch Competion Lunglei District chu vawiin chawhma dar 10:30 khan Pu V.Malsawmtluanga MLA, HPC Vice Chairman chuan Chanmari Hall Lungleiah a hawng.
Khuallian chuan hnam anga kan dinchhuahna kawngah Indigenous Games hi a pawimawh zia hrechiangtu ka ni tiin a hlutna hi kan hre tawklo thin a, hetiang ang infiamna hi a hnam ang te, a in cheina leh kan nun zemawi te chawikanna kawngah nasa takin hna a thawk a ni a ti. Kan Sawrkar chuan chuan Sports lama hmasawn turin nasa takin hma a la mek a, Infrastructure tha mai bakah Skill Developement lamah tan kan la a, thingtlang mite tan pawh Coach tha zawkte rawih sak an ni dawn tiin, Lungleiah World Class Hockey Field siam tumin ruahmanna siam mek a ni, a ti.
YMA Sub Hqrs Lunglei Vice President Pu CMS.Dawngliana pawhin thu sawiin, Indigenous Games chu YMA kum puan Ram leh hnam humhalh tih nen pawh thil inhmeh tak anih thu leh YMA member-te’n hun lokal zel turah pawh ngaihhlut chhunzawm zel tul a tih thu a sawi.
Lungleia Indigenous Games 2024 hawnna inkhawm hi Pu T.Siama Producer & PEX MIG, DDK Aizawl chuan a kaihruai a. Kalkhawmte lawmna thu sawiin, he Indigenous Games hi Broadcasting Infrastructure & Network Developement (BIND) DDK, Mizoram Indigenous Games Association, Sub Hqra YMA Lunglei leh MJA Lunglei te nen thawkho a buatsaih a nih thu a sawi bawk.
Inter Branch YMA Competition Indigenous Games ah hian YMA Branch 17 atangin infiammi an tel a, Mizo Infiamna- Insaihruipawh, Insuknawr, Inkawibah, Inarpathai leh a dangte hmangin inelna neih a ni a, Item hrang hranga pakhatna atanga pathumna te chuan November thlaa State Level Indigenous Games Aizawla buatsaih turah Lunglei District ai an awh dawn a ni.
