16 May 2024: Miss Mizoram Lunglei 2024, Jennifer Zothanzuali chuan vawiin khan Bethel Centre, Sazaikawn leh Baptist Church Orphanage Ramzotlangah tanpuina pawisafai a hlan a, MJA Lunglei member-te’n an tawiawm.
Thla hmasa April ni 4 atanga ni 16 chhung Zonet Cable T.V leh Mizoram Journalist Association buatsaih Miss Mizoram 2024 thlanna neih zawh taka Lunglei District aiawhtu leh Miss Mizoram Contest-a Miss Congeniality atana thlan Jennifer-i hian Miss Mizoram Contest an neih chhunga Social Media kaltlanga mithahnemngai leh amah duhsaktuten ama tana sum an thawhkhawm chu ama tana hmang lova, midangte tanpui nan hman a duh angin vawiin khan Bethel Centre leh Baptist Church Orphanage-ah te hian Rs 10,000/- ve ve hlanin naupangte eitur Sweet Pocket engemawzat a pe tel bawk.
Heng thilpek a hlannaah hian Jennifer-i hi a chhungte bakah MJA Lunglei member thenkhatte’n an tawiawm a. Bethel Centre a thilpek hlanna puala inkhawm hi Pu F.Lalngaihzuala, Executive Member MJA Lunglei chuan kaihruaiin, BCO hmuna thilpek hlanna inkhawm hi Pu P.C Lalduhthlanga, Vice President MJA Lungleiin a kaihruai thung a ni.
Thilpek petu Jennifer-i chuan Miss Mizoram Contest 2024 a Lunglei Dist aiawh tura sawmtu leh a tawp thlenga theihtawp chhuahpuitu MJA Lunglei chungah lawmthu sawiin, amah duhsaktuten sum an thawhkhawm chu amah kaltlanga tanpui ngaite tanpuina tura Pathian remruat nia a hriat thu sawiin, naupang fahrah khawngaihthlak tak takte enkawlna Home pahnih chu a rilruah a lan avanga tanpuina pe anih thu sawiin, amah chu a petu niin lang mahse a petu tak tak zawkte chu amah puala sum thawhtu zawng zawngte an ni tiin, heng Home pahnih bakah hian chhungkaw thenkhat hnenah tanpuina pek a la tum tih a sawi.
Vawiina tanpuina dawngtu Home pahnih a thawktute chuan sawrkar atangin tanpuina dawng thin mahse a hun tak leh mamawh hun taka an hmuh thin loh avangin mi inphalte zarah mualpho lovin an awm thin tih an sawi a, an innghahna ber chu Pathian a nih avangin Pathianin a hun takah tanpuitu a pe thin an ti. Miss Mizoram Lunglei Jennifer-i’n an mahni tanpui duhna a nei chu amah a Pathian hnathawh langchhuak ngei nia an hriat thu leh tangkai taka an hman tur thu sawiin, a kalzelna turah duhsakna an hlan a ni.
