08 July 2024: Rev. Dr Lalchungnunga Mission for Christ Founder leh President vuina hun chu vawiin khan Mission For Christ Headquarters Durtlang Leitan Hermon-ah hman a ni.
Rev Dr Lalchungnunga hi Pukpui lal Pu Taikhuma leh Pi C Kambuaii te fa unau 11 zinga 7-na niin, May ni 17 kum 1933 khan a piang a. Kum 1960 atanga 1964 chhung khan zeng natna avangin a taksa pum che thei lovin a awm a; Serkawn Damdawi in leh Durtlang damdawi inah te theihtawpa enkawl a ni chungin, a tha thei lova. Kum 1964 khan Pathian tihdamna changin, chuta tang chuan a hun puma rawngbawl turin a penchhuak a, Zoram pum suartluanin Crusader Band te nen an fehchhuak thin a ni.
Kum 1983 July thlaah Billy Graham Evangelistic Association te’n an sawm angin khawvel pum huap, Evangelist te inkhawmpui Amsterdam Netherlands ah a kal ve nghe nghe a ni. International Gospel Centre Tulsa, Oklahoma, USA chuan kum 2004 khan rawngbawltu nemnghehna an pe a; Evangelical Bible Seminary, Rangoon chuan kum 2006 khan Honorary Doctorate an hlan bawk.
Kohhran belh bik nei lo, Mission for Christ tana President nihna a chelh mekna hi rawngbawlna lama a thiante nen kum 1983-a an din a ni a; kum 2005 khan naupang enkawlna Abundant Life Home an din bawk a ni.
Rev Dr Lalchungnunga hi kum 2020 kum tawp lam khan a hriselna a tlahniam hret hret a; kumin june ni 26 khan Aizawl Civil Hospital-ah dah luh niin, july ni 7 khan Chatuan ram a pan ta a ni. Rev Dr.Lalchungnunga’n hun puma a rawngbawl chhung hi kum 66 lai a ni.
Chief Minister Pu Lalduhoma chuan Rev Dr Lalchungnunga chu Mizo ten Pathian rawngbawltu ropui a neih zinga mi a ni ti a, a kalsan tak a chungte leh a rawngbawlpuite Pathianin thlamuanin awmpui se a duh thu a sawi.
Home Minister Pu K. Sapdanga pawhin Social Media kaltlangin Mizo pa chhuanawm leh Pathian thu lama mi thawhhlawk tak a nih thu a sawi a. Health Minister Pi Lalrinpuii pawhin Zoram chhung mai bakah pawn lam ami te pawhin an tangkai pui rawngbawltu a boral chu Zofate tan channa nasa tak a nih thu a sawi ve bawk. (DD & AIR)
