27 Dec 2023: Vawiin khan Chief Minister Pu Lalduhoma chu a pisaah Maj. General Gagan Deep, Additional Director General, NCC NER chuan hmuin lawmpuina a hlan a. Mizorama NCC hmalakna zauh zel dan tur an sawi dun.
An inkawmnaah hian National Cadet Corps-in Mizorama Group Headquarters leh NCC Academy an mamawh chungchang te, NCC-ah Mizo thalai tam zawk an luh theihna turte leh Mizoram sawrkarin NCC Cadet-te a hman tangkai theih dan turte an sawi dun a. Mizorama NCC-in hma a sawn theih nana an thil tih duhte fel taka ziaka a hnena thehlut turin Chief Minister hian a lo hrilh a, a theih ang zela a lo puih tur thu a hrilh a ni. (DIPR)
