12 June 2025: Mizoram chu ram pum huapa a thlawna thisen pe tha zual zingah a tel mek a, Mizoram bikah Lunglei Civil Hospital chu nikum April thla atanga kumin March thla thlenga a thlawna thisen pek tam berna niin, a thlawna thisen pek zat hi 99.87% a tling a ni.
Akashvani News zawhna chhangin, Association for Voluntary Blood Donation,(AVBD) Vice President Pu K Zothanpara chuan India ram pumah thisen pe tha ber state hriat theih ni chiah lo mah se, Mizoram chu a pe tha ber emaw a dawttu a nih a rin thu a sawi. Kumin chhunga Mizorama thisen pek tawh zat hriat theih ni rih lo mahse, MSACS Blood Safety Division data thar berah chuan nikum 2024 April thla atanga kumin March thla thleng khan Mizoram pumah thisen unit 34,752 pek a ni a, chung zinga unit 32,566 chu pek bik nei lo va a thlawna pek, voluntary donation a ni.
Lunglei Civil Hospital chu hemi chhunga thlawna thisen pek tam berna niin, a thlawna thisen pek zat chu 99.87% a tling a. Christian Hospital, Serkawnin dawtin 98.04%, Synod Hospital, Durtlang-ah 97.71%, Serchhip District Hospital-ah 97.67%, Siaha District Hospital-ah 96.88%, Champhai District Hospital-ah 95.11%, Kolasib District Hospital-ah 93.85%, Civil Hospital, Aizawl-ah 93.43%, Mamit District Hospital-ah 92.31%, Lawngtlai District Hospital-ah 75.27% te a ni. (AIR)
