31 March 2025: Aizawl Mosque Committee leh Mizoram Muslim Welfare Society General Secretary Mohammad Mamon Majumdar chuan Mizorama hnathawh tum emaw hnathawka awm lai mek te tan Inner Line Permit (ILP) chu neih ngei ngei a tul a ni, a ti.
He thu hi Aizawl West-II Joint YMA Field, Vaivakawn a Muslim sakhaw zuitute’n Ramzan thla a an chawnghei tawp ni an lawmna, Eid-Ul- Fitr hmannaah sawiin Md. Mamon Majumdar chuan an awmna hmun ang zela insiamrem a tul thu leh ram dan an lo siam sa te chu zawm a pawimawh a, chu chu Quran ah pawh ziak a ni a ti a. Aizawl West Joint YMA Chairman Pu Rohluipuia leh committee member-te chungah khelmual hman an phalsak chu lawmawm a ti a. Eid Ul-Fitr atana an mamawh anga Police te’n an buaipui chu lawmawm a tih thu a sawi.
Md Mamon Majumdar chuan kalkhawmte chu pathian tihna nena hun hman chu thil pawimawh a ni, a ti a. Mizo mipui chungah pawh lawmthu sawiin an mamawh ang hnathawh tur an neih theihna chhan chu Mizo mipuite an ni a. Mizoram Muslim Welfare Society an thawh puinaah leh an thlawpna avanga tun dinhmun thleng thei an nih thu a sawi bawk a ni.
Aizawl Mosque hi kum 1966 March Ni 5 khan a lo kang tawh a. Aizawl Mosque Committee President ni thin Pu M. Bakhtar Uddin Majumdar kaihhruaina hnuaiah a sak hna hi thawh that leh a ni.
Vawiin Eid-Ul-Fitr tawngtai rual hian Mizoram Muslim Welfare Society member 3,000 chuang an kalkhawm a. Pushpak Mosque-ah mi 500 chuang leh Sairang Mosque ah mi 100 atanga 150 chuang an kalkhawm bawk a ni. (AIR)
