21 Sept 2024: Mizoram Pollution Control Board (MPCB)-in khawl hmanga boruak bawlhhlawh dan an teh thinnaah, kumin January atanga August thla chhung khan Mizoram khaw hrang hrangah boruak bawlhhlawh dan a inthlau hle.
MPCB tehna atanga a lan danin khaw dang zawng aiin Aizawl khaw chhung a bawlhhlawh bik tih hmuhchhuah a ni a. January atanga April thla chhung khan Aizawl District bikah Bawngkawn leh Dawrpui Veng te chu AQI (Boruak bawlhhlawh dan tehna) ah 100 a kai a. Air Quality Index-ah hian 101 atanga 200 a kai chuan chuap leh lung natna nei, naupang leh upa lamte tana harsatna a thlen tan thei a ni.
Aizawl District tih lovah chuan Lawngtlai leh Siaha District te tehnaah a sang a, khawpui chhung Boruak thianghlim loh chhan hi kawng khu leh lei laihna, insakna khu leh Bawllhlawh hal vang te a ni.
Mizoram Pollution Control Board chuan boruak bawlhhlawh chhan tam tak tarlangin lirthei pung chak leh khu chhuak nasa bakah lirthei lian khu pe chhuak nasa khawpui chhunga an luh nasat laiin boruak chhia a insiam nasat zual thu an tarlang a. Lirthei liante hian kawng chhia leh khuar chil khu in boruak a ti bal nasa hle a. Khawpui chhung ni lovah chuan bawlhhlawh hal leh thing hmanga vawk chaw chhum bakah lo halin boruak a tichhe zual a ni. (DDK)
