13 Feb 2024: Nimin khan MZP Headquarters, Lunglei chuan MZP Sub Hqrs Tlabung te Special Meeting MZP Pisa, Tlabung-ah neih puiin. Meeting hi Vanlalhriatpuia Adviser, MZP Sub Hqrs Tlabung-in a kaihruai.
Meeting-ah hian Lalpeksanga Chenkual, President MZP Hqrs Lunglei chuan, MZP chuan Borapansury a Zofate chawlhbuk an sak chhan chu Chakma an pun chak em avangin kan ram ngei a ni tih chhinchhiah nan a sa an nih thu sawiin, Zofate Chawlhbuk hi Kohhran hrang hrang Thalai pawlte paw’n work camp neih nikhuaah an hmang ṭangkai ṭhin hle tih a sawi. Marpara South hmunah pawh Zofate Zawlbuk MZP chuan a sak leh tur thu a sawi bawk.
MZP Sub Hqrs Tlabung leh a hnuaia MZP Branch hruaitute pawh an pawimawh zia sawiin, Ram leh Hnam-in min mamawh huna thawk chhuak nghal thei turin kan hriselnate kan
ngaihpawimawh a ṭul a, MZP chu Zirlaite tan a ding anih angin Mizo Zirlaite ram leh hnam tana chhawrtlak ni tura theihtawp an chhuah a ngaih thu a sawi.
Meeting chuan Local Administration Department-in Village Council Act 1953 tlawh chhana Dt 24.01.2024 a thuchhuah a siam, dan lo anga khaw din- Zohmun leh Bonasury-te Sub Village-a puan a ni hi hriatthiam har a tiin, khaw mi leh sa te hnamdang an nih avangin ram leh hnam tana him tawk lovah MZP chuan a ngai a, hma la mektu Khawthlang Group YMA-te hmalakna thlawp chung zelin hmalak chhunzawm nise a ti. Hemi chungchangah hian MZP Sub Hqrs, Tlabung hruaitute a hmunah ngei kala zirchianna neih bawk ni se tiin a rel.
Meeting chuan Gov’t Higher Secondary School Tlabung in Chemistry Lecturer an neih loh avanga Zirlai naupangten harsatna an tawh chungchang ngaihtuahin Chemistry zirtirtu an neih ngei theih nan hmalak nise tiin a rel bawk a. Chemistry zirtirtu an neih ngei theih nan a tawp thlenga hmalak an rel a ni.
MZP Sub Hqrs Tlabung Special meeting neih pui tur hian MZP Hqrs Lunglei aṭangin President, Treasurer Secy i/c Activities te an kal.
