02 November 2023: Nimin chawhnu khan Pu R.Lalremsanga, Inspector General of Prison chuan Lunglei District jail, Sazaikawn ami a tlawh a, Jail chhunga hmeichhia leh mipa ward te chip chiar taka tlawhin Jail tangten harsatna an neih an thlente a ngaihthlaksak a ni.
Pu R.Lalremsanga I.G Prison chuan thuthar thehdarhtute hnenah District Jail Lunglei chu kum 1977 a din anih avangin a building leh thil dangte a hlui tawh em em a, kumthar Financial Year lamah building leh infrastructure tha zawk neih kan beisei, a ti a. Tunah chuan thawktu indaih lohna avangin duty-te an hah hle a, hei bakah hian jail tang thei tur chin zat aia tam an tang reng a, hmeichhe ward mi 10 tan theihna turah tunah hian 26 tang an awm mek a ni, a ti.
Pu R.Lalremsanga chuan Champhai leh Lungleia District Jail-ah tang an tawt avangin sawrkar Policy angin Jail tang tlemna Serchhip leh Lawngtlai District jail-ah te Convict tawh, an tan hun chhung tur bithliah tawhte sawn dan tur ruahmanna kalpui mek a ni a, approval a awm tawh avangin reiloteah tih hlawhtlin tum a ni, a ti.
I.G Prison chuan Police, Excise leh Prison lama thawktute tanrual a pawimawh a, tunah hian damdawi hman sual NDPS case leh naupang khuaikhemna POCSO case a tam avangin Jail tang an tam phah hle tih sawiin, Kohhran leh khawtlang hruaituten theih tawp chhuaha tan lak a ngai tak zet tih a sawi bawk.
District Jail Lungleiah hian Ward tinah CCTV dah vek a ni tawh a, duty-te’n an duty pahin Ward tina tangte an hmu thei vek tawh a ni.
Nimina I.G Prison-in District Jail Lunglei a tlawh hian District Jail Supdt Pu Zosangliana leh a thawhpuiten lo dawngsawngin harsatna leh mamawh hrang hrang an neihte an thlen a ni.
Jail tang mipa 143 leh hmeichhia 27; an vaiin 170 an awm mek a ni.
