13 Dec 2023: Mizo Zirlai Pawl (MZP) General Headquarters President H.Lalthianglima chuan National Institute of Technology Mizoram hmunhma thar tur Lengpui ami tun thlenga sak puitlin a la ni lo chu hriatthiam har an tih thu a sawi.
Vawiin khan Aizawl-a thuthar thehdarhtute kawmin MZP President chuan, NIT Mizoram hmunhma chu kum 2012 October ni 13-a khatih hunlaia Union Minister of Human Resource Development Pu Kapil Sibal an a phum tawh a ni a ti a. Hetianga Technical zirna in tha Mizoram-in a neih chhun, lungphum phum hnu kum 11-ah pawh sak puitlin a ni lo hian ngaihsak a hlawh tawk loh zia a tarlang chiang hle a ni, a ti.
Mizoram tana chhenfakawm tura beiseina sang tak an neih mek laia an beisei leh duh angin a awmlo hle tih tunhnaiah hmuhchhuah a ni a ti a. Institution inawp danah te, sum leh pai hman danah te leh thawktu lak danahte thil fello tam tak inphumru a awmin MZP chuan a hria tih a sawi bawk. NIT hnalak thenkhat chu a dik tawklo hle-a an hriat thu leh induhsakna uchuak leh tih tlin tum nei sa rana lak a awm tih hriat a ni, a ti.
MZP-in NIT chungchanga hriat duh a neihte RTI hmanga zawhna an chhan danah an lawmlo hle tih sawi bawkin, zawhna pawh an chhang mumal thei lo chuan an institution inawpna felfai lohzia a tarlangah an ngai a ni, a ti.
Tun dinhmunah NIT Mizoram-ah hian programme hrang hrang; Chemistry, Civil Engineering, Computer Science and Engineering, Electronics and Communication Engineering, Electrical Engineering, Mechanical Engineering, Physics, Mathematics leh Humanities and Social Science te a zir theih mek a ni.
