CM-in Lokayukta an thuam chak tih a sawi

03 Sept 2026: Vawiinah I&PR Conference Hall-ah Vigilance Department-in Mizoram Lokayukta, Anti Corruption Bureau leh Mizoram Police te puala an buatsaih Training cum Workshop on Prevention of Corruption Act, 1988 chu Chief minister Pu Lalduhoma’n a hawng.

Chief Minister chuan, sorkar langtlang leh thianghlim din kan duh avangin rang takin Lokayukta kan thuam chak a, ACB tan lirthei thar leina kan sanction-a, Lokayukta Inquiry Officer-te chu vehicle entitlement kan pe a. ACB a thawkte hnena Special Incentive Allowance pek thin, Covid19 hripui harsatna vanga sutsak chu kan pe thar a, Lokayukta Inguiry officer-te tan kan pe thar bawk a. Anti- Corruption Campaign an kalpuina tur thlengin fund kan pe a ni.

Hmanraw lamah thuam tha viau mah ila, a thawktute thiamna leh finna te, an inpeknate kha a pawimawh ber zawk avangin Vigilance Department chuan vawiinah an pualin training leh workshop a buatsaih leh ta a ni.

Kan Inquiry Officer-te hi danin thuneihna sang tak a pe che u a, in thuneihna hi dan angin eirukna leh hlemhletna hmuh chhuah nan hmang ula. Investigation in kalpuina tinrengah tu mitmei mah veng suh u. Department hrang hrangte nena thawhhona tha neih a tul avangin department zawng zawngte pawh lo thawhpui tha tur che uin ka chah a ni.

Hna in thawk tha tih ka hria a, chutihrualin pending inquiry leh pending case te pawh in la nei nual tih ka lo hria a. Theihtawp in lo chhuah zel dawn nia, tiin a chah. Training cum Workshop buatsaihtu Vigilance Department chungah lawmthu a sawi bawk a ni.

Pu Khilli Ram Meena, Chief Secretary, Chief Vigilance Officer ni bawk chuan training an buatsaih chhan (keynote) a sawi a. Eirukna dona hna thawktute kan tuaihriam hian an theihna a lo pung ang a, chak zawkin hma an la thei dawn a. Anmahniah phurna leh thawhhona tha zawk a siam kan beisei a ni, a ti.

Pu Joel Joseph Denga, Member (Judicial), Mizoram Lokayukta leh Pu Sharad Agarwal, Director General of Police, Mizoram ten thu tawi an sawi bawk.

A hawnna inkhawm hi Dr. YLN Reddy, Secretary, Vigilance Department chuan a kaihruai a, kalkhawmte lawmna thu a sawi a. A hawnna neih zawh hian Technical Session nei zuiin Pu Joel Joseph Denga, Member, Lokayukta, Pu TL Guite, Secretary, Law & Judicial leh Dr. HTC Lalrinchhana ten training an pe a ni. (DIPR)