Operation ZAWLBUK tan dawn

28 Aug 2026: Pu K.Lalfakzuala, President YMA Sub-Hqrs Lunglei chuan kum 1989 atanga kan thalaite nunna suat tantu Ruihhlo hi Pasaltha Khuangchera’n sakei sual a um ang khan huaisen takin kan puanven sawichhingin do ila – ‘Ruihhlovin a tih buai ni lovin, Ruihhlo tih buaite chhan chhuaktu’ nih i tum theuh ang u tiin YMA member-te a sawm.

He thu hi nizan Dt.27.08.2026 (Ningani)-a YMA Bazar Veng Branch-in kumpuan Ruihhlo Do hawn inkhawm, Bazar Veng, Community Hall -a an buatsaihah sawiin khuallian Pu K.Lalfakzuala chuan, hmanlai kan Mizo nunah hmelma laka khawtlang chhan a ngaih chuan Zawlbukah khan Val Upa leh Tlangval rualte’n ro an rel thin a, chutiangin kan tun hun Ruihhlo zuartute’n tunlai thiamna leh remchanna tinreng nena an hnampui Mizo te chi thlah awm lo khawpa kan awm pawisa lova, Ruihhlo a min hrai leh min zawrh hi do let tura Zawlbuk a kan ral rel bawhzui turin; YMA hian ‘Operation Zawlbuk’ kan tan a ngai ta a ni, a ti.

Pu Faka chuan Kum 2026, January atanga May thla chhung khan kan hmelma ‘Ruihhlo’ hian thalai mi 21 lai a lo ti hlum hman leh tawh tih sawiin, YMA in ‘Ruihhlo Do’ Kumpuan, kum 22 hnu a kan puan nawn leh chhung hian ‘Ruihhlo’ hian he ‘Ram leh Hnam’ hi min lo khawih na hman êm êm a, Thingtlang kilkhawr ber ber thlengin min luhchilh ta tlat mai a, Hnam chi kengtu, ‘Mipa’ te phei chu kan thi nasa êm êm a ni a ti. Lunglei khawpui veng hrang hrang hi han en ila hnathawk tur ‘Mipa’ kan awm tha ta mang lo, Hmeichhiate’n mipa kan liam zel hi an mang a ang a, an rawn au chhuak mek a, hei hi kan hnamin Ruhhlo laka kan thalaite nunna chhan a ngaih zia tilang tu a ni a, ngaihthah chi a ni tawh lo a ni a ti.

Pu K.Lalfakzuala chuan Ruihhlo zuarte’n hei hi lo hre rawh se; Ruihhlo zawrh hi Dan leh thupek bawhchhiatna a ni satliah ngawt lo va, thalai tam tak nun tichhetu in ni a, Mizo thalaite suattu in ni. Nangmahni avangin Nu leh Pa tam tak an ṭap a, fahrah tam tak an awm phah a nih hi! Ruihhlovin a luhchilh chhungkuate hi kan nâ a, a la luh lohna chhungkuate pawh hi hlauhthawnnain kan khat a, sim mawlh rawh u tiin ruihhlo zuar luite a chah bawk.

YMA Bazar Veng Branch Kumpuan Ruihhlo Do hawn inkawm hi Pu Hmingthanghluana, Vice-President chuan kaihruaiin Pu Lalrammuana Chawngthu, Adviser-in hunserh a hmang a, Tv.H.Lalramdinliana President in fuihna thutawi sawiin; NGO leh LC aiawhte’n thutawi an sawi a ni.

Kumpuan hawn inkhawmah hian Branch Executive Committee member leh Kumpuan Committee member leh Section aiawhte bakah LC, MHIP leh MUP aiawhte telin, YMA Sub-Headquarters Lunglei Executive Committee member – Pu K.Lalhmingliana, Pu P.Lalbiakzuala, Tv H.Lalawmpuia leh Tv P.Lalrimawia leh zaithiam Lalenkawli Pautu ten an telpui bawk.

Tun dinhmunah YMA Bazar Veng Branch hi Section pasarihah inthenin YMA member 2,000 chuang an awm mek a ni.