Sial sa nen champion lawmna ruai buatsaih

17 July 2026: Pu T.Lalhlimpuia Lunglei West Bialtu MLA chuan vawiin chawhnu khan Bazarveng Lunglei Local Council Team; 15th HPC Cup 2026 Champion lawmna hun khuallian niin a hmanpui.

Khuallian chuan, Champion Nomawi hi van atanga lo tla a ni lo va, player-te thawhrimna, inpumkhatna tha leh veng chhung mipuite support that avanga lo awm a ni a, hetah hian tawp lovin, hmasawn zel i tum ang u, a ti.

Champion lawmnaah hian khuallian bakah LMC Chairman Pu Lalzuithanga te chuan thu an sawi a, LDFA lam atangin thu an sawi bakah champion lawmpui nan Bazarveng Team kutah football an hlan bawk. MHIP Zaipawl zai bakah champion team chawimawina leh zaihona hunte hman ni bawkin, tlai lamah Sial sa nen Champion lawmna ruai khawtlang huapa theh a ni.

Champion lawmna hun hi Gov’t Bazar High School Hall-ah hman niin, Chairman Local Council, Bazarveng Pu C.Biakthankima chuan hun kaihruaiin, Rev. Michael Lalchhuanawma’n hunserh a hmang a, Vice Chairman Local Council Pu C.Vanrosanga’n lawmthu sawiin hun a khar a ni.

15th HPC Cup 2026 hi May ni 16 aṭanga June ni 26, 2026 chhung khan C. Ṭhuamluaia Mual, Lungleiah khelh niin, Men’s Team 29 tel zingah Bazarveng LC Team hi an champion a. Champion lawm nan hian Celebration Committee din niin, Bialtu MLA Pu T. Lalhlimpuia’n sial pakhat thawhin, Bialtu Councillor Pu Lalzuithanga, Local Council leh mi ṭhahnem ngaite thawh khawm aṭangin sial pakhat lei belh a ni bawk.