“Tlabung hi Chakma khua a ni ngai lo” – YMA Sub Hqrs Lunglei

26 Aug 2026: Ex-Minister, West Tuipui Bial MLA hlui-in Tlabung chu Chittagong Hill Tracts a bet thin a nih thu a sawi chungchangah YMA Sub-Headqarters Lunglei chuan hetiang hian thil nihphung a sawifiah:-

” Kum 1947-a India leh East Pakistan (Tuna Bangladesh) inthen laia Chittagong Hill Tracts East Pakistan a beh tir chu thil tih sual lian tak a ni a, India ram chhungah rin luh leh ni rawh se, tiin Chakma hruaitu thenkhat ten Central Sorkarah an thlen, tih thu a awm lai a, Ex-Minister, West Tuipui Bial MLA hlui chuan Tlabung chu Chittagong Hill Tracts a bet thin a nih thu a sawi, tih thu kan hriat leh chung changah, YMA Sub-Headqarters Lunglei chuan thil nihphung sawifiah tha a ti a.

Chittagong Hill Tracts ah hian Zofate an cheng hmasa ber a, ram leh lui hming tam tak pawh Mizo hming vuah thin a ni. Zofate zinga Chittagong Hill Tracts luah hnuhnung ber chu Thangluah, Rivung leh Zadeng hnam an ni a, anni hi kum 1750 velah an lut thla a ni. AD 1862
Chittagong bial Annual Report, Superintendent ziahah chuan Kuki (Mizo) 25,980 vel an awm tawh. (Source; A Statistical Account of Bengal Vol. 6. 1876)

Mizo lal ropui, Rothangpuia Thangluah khan Mizoram chhim tawp thlengin a luah a. A ram chin chuan Lungsen leh Sirte tlangdung a huam vek a, Tlabung pawh a lalna ramchhung vek a ni, tihna a ni.

Chittagong Hill Tracts hi Chakmate ram bil a ni ngai lo va, Zofate hi luah hmasa bertu an ni zawk a ni. Chutiangin, Tlabung pawh hi hmanlai atanga vawiin thlengin Chakma khua a ni ngai lo va, Zofate khawpui pawimawh a ni reng a ni.

Kan Pi leh Pu te chhana kan ram hi tute mahin min hneh chhuh leh min nek zim sak hi YMA Sub-Headquarters Lunglei chuan kan phal lo a, engtik lai mahin kan remti ngai dawn bawk lo a ni.”