24th October 2024: Vawiin khan Lunglei khawpui chhunga Power & Electricity (P&E) Department-a hnathawktute intuatharna hun, departmental meeting chu Convention Centre, Lungleiah buatsaih a ni.
Lunglei Power Circle-a Superintending Engineer Er Lalrinmawia chuan hawnna thu sawiin, thawhhona ṭha pawimawhzia te, power network vil ṭhat a ngaih thu te leh mipui (consumer)-te ngaih pawimawh a ṭulzia te a sawi a. Intawhkhawmna hun chu buatsaih zen zen theih anih loh avangin hlawk leh ṭangkai taka hmang turin kalkhawmte chu a chah a. Midangte tana thil ṭha ti a, malsawmna nasa zawk thlentu nih tum turin a chah bawk.
Intawh khawmna thupuiah hian ‘Sharing Expertise and Best Practices’ (thiam thil leh tih phung ṭha inhrilh tawn) tih hman a ni a. Department chhunga tawnhriat nei ṭha tak tak – Er Lalngaihsaka, EE, Power Maintenance Division-II, Lunglei; Er Zoramdina Ralte, EE, Power Maintenance Division-I, Lunglei; Er JV Thangluaia, SDO, Distribution Sub-Division, Lunglei; Er C. Lalduhawma, Lunglei Sub-Station Sub-Division, Khawiva leh Pi Lalhunthari, JE, Revenue Sub-Division, Lunglei te’n an thiamna leh tihdan phung ṭhate zirtirna an pe a ni.
He hunah hian mipuite hnena ṭha zawka kawlphetha (power supply) pek dan tur te, mipuite tana awlsamna siamsak dan tur leh ṭha zawka dawr theiha awm dan tur te, power bothlau tihtlem dan tur te, electric bill ṭha zawka dawn dan tur te, chetsualna (electrical accident) pumpelh dan tur te leh ni tha chakna khawl (rooftop solar) chungchang te zir hova, sawiho a ni.
