Pu K.Vanlalvena leh Dr R.Lalthangliana te’n Kawrpuichhuah Border Trade tur an tlawh
09 April 2024: Lok Sabha MP Inthlan lo awm tura MNF Party candidate Pu K.Vanlalvena leh amah \awiawmtu MNF Senior Vice President Dr R.Lalthangliana te chuan nimin khan Tlabung leh Chawngte fangin Street campaign an nei a. MNF General Headquarters Aizawl leh MNF Sub-Headquarters Lunglei atangin hruaitu engemawzatin an tawiawm .
Pu K.Vanlalvena chuan Zohnahthlak hnam hrang hrangte insuihkhawm chu a duh ber leh a tum lian berte zinga pawimawh ber a nih thu a sawi a. Manipur Meitei unau te, Assam sorkar leh Myanmar sipaite huat hlawh khawpin Zohnahthlak te thlavang ka hauh a. Delhi thlengin Assam Police-te’n min umzui a, ka nunna atana hlauhawm khawpin beih ka tawk a, kan ram tan chuan thih pawh ka hlau lo. Meitei leh Myanmar sipaite nasa taka huat ka hlawh bawk, a ti.
Pu K.Vanlalvena chuan ka thlavang hauhsak te hian in vote hmangin in duhsakna hlu tak lantir ve turin ka ngen takzet che u a ni, a ti bawk.
MNF Sr Vice President Dr R.Lalthangliana pawhin Pu K.Vanlalvena hi amah leh a chhungkaw tan ni lo, ram leh hnam tan Jail-ah vawi 8 lut tawh leh lock-upa vawi 3 lut tawh a ni, a ti a. Lok Sabha MP-ah hian lo thlang tling ula, a hmunruak Rajya Sabha MP chu ruling party-in an luah mai ang a, kan insem a ni mai, a ti.
Nimin khan Pu K.Vanlalvena leh Commerce & Industries Minister hlui Dr R.Lalthangliana te hian Kawrpuichhuah Border Trade, Khawtlang Tuipui chunga Motor Lei Rs Vbch 54 senna tur, Pu K.Vanlalvena MP (RS) hmalaknaa Central Sorkar-in a sanction tawh chu a hmunah an enfiah nghal a; hna chak taka a kal theih nan bawhzui thuai thuai a tum thu a sawi bawk.
