07 Aug 2025: Mizoram Sawrkar ruahmanna angin Lungleiah pawh D.C Office lam chuan Lunglei District-a raltlante khawl hmanga an nihna finfiah theihna tura chhinchhiahna, ‘Biometric Enrolment’ a kalpui mek.
Raltlan Biometric Enrolment hi Ramthar Veng Local Council huamchhunga awm Nghahsih kawng raltlan Camp-ah zawh tawh niin, helai hmunah hian mi 67 ziak luh an ni. Tunah hian Thaizawl raltlan Camp-ah chhunzawm leh mek niin, Thaizawl Camp-ah hian August ni 5 thleng khan mi 37 Biometric Enrolment tih sak tawh niin vawiin lam pawh khan chhunzawm leh a ni.
Independence Day lo thleng tur inbuatsaihna avanga thawktute indaihlohna avangin Biometric Enrolment hi kal chakpui theih anih loh thu leh Independence Day zawh hnuah chuan chak zawka kalpui theih an tum tih D.C Office lama thawktute chuan an sawi.
Lunglei DC office-in an chhinchhiah danin, tun dinhmun (August 2025)-ah Lunglei District chhungah Myanmar aṭanga raltlan 1,991 awm mek anga chhinchhiah a ni a. Mipa puitling 545, hmeichhe puitling 660 leh naupang 786 an ni.
Lunglei District chhungah Bangladesh aṭanga raltlan mi 63 awm bawkin, mipa puitling 18, hmeichhe puitling 17 leh naupang 28 an ni.
