15 Oct 2024: Nizan khan Southern Division Salvation Army Youth Council (SDSAYC) leh District Health Society, Lunglei District te ṭangkawp huaihawtin Southern Division huam chhunga Salvation Army Youth member-te tan Horeb Corps, Lungleiah ruihhlo ṭhat lohzia inzirtirna (drug awareness) leh natna inkaichhawn theih loh (non-communicable disease – NCD) chungchang inzirtirna hun buatsaih a ni.
He hun hi SDSAYC Assistant Secretary Pu Kingland Ramdinpuia chuan a kaihruai a. Divisional Youth Secretary (DYS) & Convener, Salvation Army Motorcycle Ministry (SAMM) Capt.Timothy Lalhlimpuia chuan inlawmna thu leh SAMM chungchang a sawi a.
NCD Sub-Committee Chairman, Lunglei Addl DC Pu James Miahlung chuan Healthy Lunglei District Campaign kalpui dan tarlangin, nunphung hrisel nei tura kohhran ṭhalaite fuihna thu a sawi a. SAY member-te chu zuk leh hmuam laka fihlim tur te, ruihhlo dona kawnga theih tawp chhuah tur te, ei leh in uluk a, taksa sawizawi ngai pawimawh tur te leh midang hnena zirtirna pe chhawng ṭhin turte’n a chah a ni.
Ruihhlo do leh NCD campaign-ah hian Sazaikawn UPHC-a Medical Officer Dr Ruth Lalrinawmi chuan NCD vei theih dan te, a hlauhawm dan leh inven dan te tar langin, NCD laka fihlim tura tih tur leh tih loh turte a zirtir a. WADA Centre-a Counsellor Pu Ch.Lalhruaitluanga chuan ruihhlo ṭhat lohzia a zirtir thung a. Huho zai leh mal zai te ngaihthlak niin, SDSAYC Secretary Tv.Job Lalrinchhana’n lawmthu a sawi a, Haulawng Bial CO Capt. Lalhruaitluanga Tlau chuan malsawmnain hun a khar a ni.
Awareness campaign hun hman zawh hian SAY member-te hriselna dinhmun chu health department-a thawktute’n an endiksak nghal bawk.
