26 Oct 2024: Mizoram Boxing Association(MIZBA) leh Hnahthial District Boxing Association (HADBA) te tangkawpin a an buatsaih – 43rd State Boxing Championship, 2024; GSA Hall, Hnahthial District a neih chu nizan khan kharna hun hman a ni a, South Tuipui bialtu MLA Pu Jeje Lalpekhlua’n khuallian niin a hmanpui.
Khuallian chuan kalkhawm zawng zawngte chu chibai bukin Boxing Championship, Hnahthial District-a thlen a ni chu lawmawm a tih thu a sawi a. Boxing chu sports zingah pawh taksa hrisel leh fit that ngai ber te zing ami anih avangin insum theihna leh tih hram hramna nun neih a pawimawh thu a sawi a. Sawrkarin hmalakna hrang hrangte nei thin mah se a tawpah chuan mipuite chu an pawimawh ber a ni a ti a. Infiamna lamah te, zirna leh kawng engkimah hma kan sawn zawk theih nan ruihhlo dona kawnga tangrual turin kalkhawm te chu a sawm nghal a ni.
Boxing Championship kharna hunah hian MIZBA member te leh HABDA member te bakah Hnahthial SP, Pu Manny Bhushan Singh leh Addl SP Pu Beimosia Lapi te an tel a ni.
October ni 22-25 inkara Boxing Championship neih zawh takah hian District zawng zawng atangin a vaiin Mipa 186 leh Hmeichhia 33 te an tel a ni.
A pumpuiin Hmeichhe team-ah Aizawl SAI chuan Gold Medal – 6, Silver – 1 leh Bronze – 1 lain team champion an ni a, pahnihna lawmman chu Lunglei SAI in an la a ni.
Mipa team champion chu Lunglei SAI niin Gold – 9, Silver – 4 leh Bronze – 1 an la a, pahnihna lawmman Aizawl SAI in an la. Best Boxer Hmeichhia-ah Lalrinngheti, Aizawl SAI thlan niin Mipa-ah Lalhruaitluanga, Hnahthial thlan a ni bawk.
