TB natna vei mekte’n chaw tha an ei theihna turin pawisa pe

17 Sept 2026: Nimin khan NEDFI Lunglei Branch chuan Lunglei District chhunga TB natna vei mekte’n chaw tha an ei theihna turin Rs.131,900 an pe.

North Eastern Development Finance Corporation Ltd (NEDFI) chuan TB vei mi 25-te’n eitur tha thla 6 chhung an eina tur pawisa hi hlanin Branch Manager Pu Lalhruaizela Fanai chuan Dr.K.Lalhmachhuana hnenah a hlan.

He hun hi District TB Centre, Conference Hall-ah hman niin, District TB Officer Dr. K.Lalhmachhuana chuan hun kaihhruaiin NEDFI-in hetianga TB vei mek taksa tih chak mamawh em em te tan an luangchhuak thin chu ropui a tih  thu a sawi.

Branch Manager Pu Lalhruaizela Fanai chuan, NEDFI hian North East state 4-ah hetiang hi an kalpui thin thu a sawi a, Mizoramah mi 100 tan Rs.510,000 an pek chhuah thu a sawi a, chung zingah chuan Lunglei district a TB veite tan an che chhuak thei leh thawktuten thahnemngai taka a dawngtu tur awm tak takte hnena felfai taka an pe thinte chuan a tih phur thin thu leh chhunzawm zel tlak anih zia te a sawiin, kum 2024 atanga he tanpuina hi pe tanin a kum 3-na tura an pe leh thei pawh hlu a tih thu a sawi a. Tun tuma tanpuina hlan hi mi 25 tan thlatin Rs. 21,400 zel tur anih thu leh nakum 2027 February thla thleng Rs.131,900 pek anih tur thu a sawi.

Pi ZD. Lalhmingchhuangi, Accountant hnen atangin tanpuina dawn thin atanga damlote hnena an luan chhuah dan te, ei leh in tha an pek dan kimchangte ngaihthlak niin Pu Zohmangaihsanga Chhakchhuak, District PPM Coordinator hnen atangin TB enkawlna chungchanga thil thar awmte leh hriat tur tulte ngaihthlak a ni. TB umbo tumna kalpui mekah TB damlote hamthatna pek hian kawngro a sut nasat zia te sawiin, TB Free Village puanna tura tehfung pakhat zinga a tel thu leh hemi kawngah hian thangharh a, uar zawka luan chhuah zel a tul zia te sawiin lawmthu a sawi nghal a ni.

Kumin 2026-ah Lunglei District-ah TB vei 124 hmuhchhuah tawh niin, heng zinga mi 59-te chu chuap TB vei an ni a, Thalai kum 20 atanga 40 inkarte chu vei tam ber an ni.