07 Aug 2025: Nimin khan Lunglei DC Conference Hall-ah Lunglei District huap inelna, Lunglei District-a khualzinte tana tlawh chakawm tur hmun pawimawh leh nuamte chanchin hmanga thawnthu insawisiak (storytelling competition) buatsaih a ni.
He intihsiakna hi Tourism Department-in ‘Narrating Mizoram: Tales of Our Land’ tih thupui hmanga ram pum huap thawnthu insawisiak a buatsaih tura Lunglei District aiawhtu tur thlanna a ni a. Inelnaah hian mi paruk telin, Lunglei District-a hmun pawimawh thlan chhuah 15 aṭangin an hmun duh thlan 5 aia tlem lo chanchin sawiin an intihsiak.
Lunglei District Information & Public Relations Officer Pu C. Lalhruaitluanga’n hun a kaihruai a. Government Higher Secondary School Lungleia Lecturer Pu C.Lalrindika’n intihsiakna kalphung leh hriat tur pawimawh hrang hrang a sawi fiah a. Intihsiak zawhah lawmman sem nghal niin, Bawrhsap pisa aiawhin Pu Benjamin Rosangkima’n lawm thu sawiin hun a khar.
Higher and Technical Institute Mizoram (HATIM)-a Bachelor of Arts (Education) 5th Semester zirlai, Zorimawii (Lunglei Ramthar) chu pakhatna a ni a. Pawisa fai Rs 10,000 leh thuziak dawngin, August ni 8, 2025 (Zirtawpni) zana Ignite Studio, Aizawla Mizoram pum huap inelna buatsaih turah Lunglei District ai a awh dawn a. Pahnihna Joseph Hmangaihsanga (Lunglei Venglai) chuan Rs 7,000 leh thuziak dawngin, pathumna HATIM-a BA (English) 1st Semester zirlai Florence Lalbiaksangi (Sairep) chuan Rs 5,000 leh thuziak a dawng thung. (DIPR)
