Missionary-te’n zirna, faina leh hawrawp min hmelhriat tir hma khan Pathianin kan pi leh pu te kha finna leh remhriatna nasa takin a lo thuam a. Van sânga arsi an sawi dan te leh khaw awmdan an lo thlir dan te kha a fing em em a; an khawtlang inrelbawlna te kha a felfaiin a zahawm em em a ni. Kum 1871-a Lushai expedition neih a nih hma kha chuan pawisa an la hmang lova, bungrua (goods)-a inlei tawnin mamawh an phuhru ve thin a, chung chu ‘barter system’ an ti a ni. Rubber kha chi (salt) nen te khan an thleng thin a ni àwm e.
Tun hma khan tanpui ngai, fahrah leh hmeithai te kha lo lamah pawh an pui thin a; lo neih kha an ei hmuhna ber a nih avangin. Chu tanpui duhna thinlung chu Mizo rilru-ah hian a la thi reng reng lova, ram leh hnam anga harsatna kan tawh chiah hian a lo langchhuak a ni. Harsatna hi darthlalang a ni a, a nasat poh leh a fîm ting mai a. Eng thil emawah chuan khawpui leh thingtlang lam te kan inpuh tawn a, kan inrelin kan insel bawih bawih a, mahse khawpui kan han tàm dawn takah chuan thingtlang te’n ei tur kan neih loh hlauvin Hripui lêng kârah hmun hla tak tak atangin min rawn pe a, lirthei lian pui puiin a lo thleng chuah chuah a. Petrol/Diesel man tura an pek pawh khawtlang rawngbawlna atana hlanlêt an awm hial a. Hei baka mihring mihrinna enge awm chuang? Han insel bawrh bawrh thin mah ila kan la inhmangaih a, hei hi ramdanga kan hnampui awm te pawhin an thlakhlelh a rinawm.
Degree sâng neih te, hna sâng thawh te kan ngaisang a; kan ngaihsan thin vak loh lo lama thawkte’n harsatna tawpkhawkah chuan ei tur min hlui a, an va hlu em. Nu leh pa tam tak chuan an fate hnenah kuthnathawh chu hna hniam entir nana hmangin “Lehkha i zir that loh chuan sawtiang sawn i thawh ve a ngai ang” tiin an zirtir thin a. Kuthnathawh hi hna zahawm leh zah phû tak a ni zawk tih hi kan tun boruak atang hian thingtlang lam hian khawpuia chengte hi hawihhâwm takin an cheêtzia hmangin min hrilh mek a ni.
Hna hmu turin lehkha kan inzirtir a, pawisa hlawh turin hna kan thawk a, ei tur kan neih nan pawisa kan zawng a, thawhchhuah kan tum thin a. Han kal kual viau thin mah ila a tawpah chuan kan pumpui hrai puar hi tupawhin kan tum chu a ni a. Chu kan thil tum chu kan leilungah hian a awm a, leilung atang ngeia intodelh pawimawh zia hi kan hriat chian a ngai hle mai. Leilung atanga intodelh tur leh a hausakna lachhuak tur chuan thlan tui far ngeia hnathawh hi kan tih tur a ni.
Rim tak leh thlantui far zawih zawih chunga buh leh bal thlochhuaktu thawhrimna avanga vawiinah hian chhuanchham lo kan ni tih hi Hripui lêng hian a tak ngeiin min zirchhuah nawn tir a. Kuthnathawktu hi hmusit thei kan nih loh zia hi kan mit ngeiin vawiinah hian kan hmu a ni. Chuvangin kan fate kan zilhhauin, kuthnathawh hmusit leh ngainêp zâwnga zilh leh fuih hi bansan a ngai tih kan hre chiang tawh àwm e. Pawisa tam tak neih a, Mobile-phone leh Computer hmanga games khelh reng hian chaw kan nghei thei tih hi kan inzirtir nawn a ngai hle mai.
Mi hausa zawk leh huan ram zau tak nei thei te hian he Hripui hmang hian buh leh bal-a intodelh a tul zia hria-in hma la thei se la. Ramngaw chereu zel tur humhalh pah chung siin lo leh huan neih uar tura hmalak a pawimawh zia te hi hre nawnin, chumi tur chuan ke han pen mawlh teh se. Chuti anga intodelh tum taka keimahni ngeiin kuthna kan thawh ngat chuan kan chhungkua leh kan ram chu ei leh in-ah kan lo intodelh vat dawn tih hi a lang nghal reng a ni.
Hna hreawm leh hahthlak zawk, hmuhsitawm leh lehkhathiam lo thawh tura kan ngaih, thingtlang mite hna ni tura kan dah kuthnathawh hi a pawimawh zia leh tisa thila kan damkhawchhuahna tura a hnuk pui ber a ni tih hi tun Hripui boruak atang hian hre chiang nawn ila. Sum leh pai tam tak kan neih avanga awlsam taka kan ei leh in tur kan lei hi kuthnathawktu thawhrimna rah a ni tih muangleia kan awm hunah pawh theihnghilh lovang u. Vawiinah phei chuan sum sèn ngai lovin, a thlawnin, rim taka an thawhchhuah ei tur kha a thlawnin min pe a; zah leh chawimawi an va phû tehlul em!
Sawrkar hna thawk kan awm ang a, kuthnathawk pawh kan awm reng ang. In mamawh tawn leh in tanpui tawn tur kan ni a, in hmusita inchhuang thei kan awm lo. Kan hna ve ve hi in zah tawn sak a phû a, kan hlutna ve ve kan in hriatsak tawn a pawimawh hle. Khawpui mi leh thingtlang mi hian hlutna kan nei ve ve a, kan in hlut tawn thiam hian kan in tichak tawn a ni. Lungpui leh lungte kan inkamki tawn a; chu chuan mihring, ram leh hnam inpumkhatna a lo siam reng mai.
Pawisa neih loh hi intodelh lohna a ni lova; pawisa ringawtin a lei theih loh thil, kan kut ngeia kan thawhchhuah ve ngai a awm a ni tih hi hre thar ila. Pawisa tam tak nei chungin kan ei leh in tur hi lei tur kan hmu zo lo thei tih hi hre chiang nawn ila. Kan theihna dan danin kan nitin ei tur mamawh hi kuthnathawh hmanga thawkchhuak tura inbuatsaih tel a ngai tih i zirchhuak ang u.
Thingtlang leh khawpuia chengte hian tun aiin kuthnathawh uar ila. Pawisa hmang chauha intodelh lovin kan kuthnathawh hmang pawha intodelh turin ke pen thar ila. Ramdang chawmhlawm kan nihna te pawh hi kan kalsan thei ang a, hnam intodelh leh hnam huaisen kan lo ni thei ang. Chawmhlawm leh thawhchhuah nei lo hi chu mahni chhungkua-ah ngei pawh thu kan nei lovin kan huaisen tawk lo fo a nih hi. Keini Mizoram pawh hian kuthnathawh kan uara kan intodelh ve hma loh chuan India ramah hian kan huaisen ve ngai dawn lo tih hi hman atanga vawiin leh naktuk-ah pawh thudik a ni tih hre chiangtute kan ni.
Sem te, a thlawna dawn ringawtte hian min lo chhandam lo tih hre turin kan fing ve tawk tawh a. Pawisa hmanga lei theih loh chin hi a awm tih vawiinah hian kan lo hre chiang ta a. Mahni thawhchhuah ngeia intodelh turin kuthnathawh a pawimawh zia leh a hlutna hi Hripui lêng hian min zirtir chhuak mawlh se la. Pawisa leh kuthnathawh hlutna hi intluk tir ila, engah tehlul nge kan retheih reng tehlul ang?
