09 July 2025: Vawiin khan Rural Development & Administration Minister Prof. Lalnilawma leh SELCO Foundation hotute chu Minister Pisa-ah inkawmin, thingtlanga kuthnathawktute’n an thlai thar chhuahte chhun zan zawma an zawrh theih nan bazar shed/road side market-a power supply changtlung tak pek dan tur an rel.
Prof. Lalnilawma chuan kuthnathawktute’n an thlai tharte chhun lam chauh ni lo, zan lam thlenga awlsam taka an zawrh chhuah theih nana ruahmanna siam sak a pawimawh thu sawiin, SELCO Foundation te’n nizung tha chakna hmanga power supply (Solar powered lightning) an pek theih chuan thingtlang lama kuthnathawktute’n an thlai tharte chhun zan zawmin an zuar chhuak thei dawn a ni, a ti a. A taka puitlin a nih ngei theih nana theihtawp chhuah tlan a tul thu sawiin, a tul angte bawhzui turin RD leh SELCO Foundation hotute a chah a ni.
He hunah hian hmalak dan tur leh pawimawh dangte sawiho niin, bultan nan leh enchhinna hmasa atan RD Department chu zo khaw lama thlai thar zawrhna bazar shed/road side market, hmalakna hmasa turte thlang chhuak tura ruat an ni a, SELCO Foundation te’n hma an la ang a, a tul dan ang zela kalpui chhoh tum a ni.
SELCO Foundation hi Non-Profit-NGO niin, Bangalore, Karnataka-ah an inkhuar a. Retheihna umbo a, kawlphetha thianghlim nizung chakna solar energy hmanga boruak thianghlim leh hmasawnna tluantling thlen turin tribal area, thingtlang leh hmun kilkhawr zawkahte hma an la thin a. Eizawnna mil zela hman theih tur khawl, design leh technolgy hmangin an siam rem thei a, power hmang tlem leh man tlawm zawk khawl an chhawpchhuak thin a ni.
Rural Development & Administration Minister hi Pu R. Zarzosanga, Commissioner & Secretary; Pu V. Lalengmawia, Addl. Secretary leh RD Department hnuaia official dangte’n an tawiawm a ni. (DIPR)
This website uses cookies to improve your web experience.