
Thudiklo vawrhdarhtu chhuichhuak turin hriattir
21 Jan 2025: State Election Commission, Mizoram (SEC) chuan General Election to Village Councils, 2025 neih mai tura atan thil pawi thei, VC Candidate qualification chungchangah thudiklo Social Media-ah vawrh darh niin a hria a. Hemi chungchang hi SEC chuan a ngai thutak hle a, nimin khan Superindentent of Police, Aizawl, Lunglei, Serchip,Champhai, Mamit, Kolasib, Saitual, Khawzawl leh Hnahthial District te hnenah he thudiklo vawrhdarh chungchangah hma laa, thudiklo vawrh darhtu chhuichhuak turin a hriattir.
SEC in a tarlan dan chuan, “BPL & AAY dawng bik ho sawrkarin mirethei a chhiar tel te chhungkua te chu VC-ah an ding thei dawnlo tih hriat a tha ang, ding an awm anih chuan complain te a awm palh anih chuan Election Commission-in an cancel sak thei ang”, tiin Social Media Platform hrang hrangah thudik lo vawrh darh a ni mek a. SEC chuan a hnuaia tarlan ang hian Qualification of Candidates for VC Election chungchanga dan dinglai a tarlang:-
“The State Election Commission, Mizoram clarifies that there is no official notification regarding the Qualification of Candidates for the ensuing General Election to Village Councils, 2025 except as is provided under the Lushai Hills District (Village Councils) Act, 1953 as amended and the Mizoram (Election to Village Councils) Rules, 2014”.