Vawiin (Sept ni 20, 2023) chhun khan Lunglei District Youth Congress Committee (LDYCC) hruaitute chuan Lungleia thuthar thehdarhtute Lunglei Press Club-ah an kawm a. He hunah hian Moses Lalrinchhana, President, LDYCC chuan, TRAUMA Centre, Civil Hospital Lunglei; June ni 20, 2022-a Health Minister Dr. R.Lalthangliana hawn hi chhim mipuite tan ṭangkai taka hman anih theih nan Mizoram Sawrkar hian engtikah nge hma a lak dawn tiin, a taka hman theih siloh hawn a ni ringawt hi mimal hmingṭhat tumna mai a ni, a ti.
Civil Hospital Lunglei TRAUMA Centre Building chu hawn anih aṭanga kum 1 leh thla 3 hnuah pawh luah a la ni lo va, thawktu tur pakhatmah dah a la ni lo tiin; lungchhiat thlak an tih thu LDYCC hruaitute chuan an sawi.
