13 June 2025: Vawiin chawhnu dar 1:00 khan YMA Sub-Headquarters  Lunglei chuan YMA Day vawi 90-na, June ni 15, 2025 lo thleng tur pualin Lunglei khawpui chhunga Home thlan bikte hnenah thilpek hlanna hun, YMA Sub-Hqrs Lunglei O.B Room-ah an hmang.

He hun hi  Pu Zothanzuala Hnamte, Secretary, YMA Sub-Hqrs Lunglei chuan kaihruaiin, YMA Sub-Hqrs Lunglei-ah hian Group 12 leh Branch 133 awmin Member 52,172 an awm mek thu sawiin, YMA Sub-Hqrs. Lunglei hian District pathum – Lunglei District, Lawngtlai District leh Siaha District te a huam vek thu a tarlang bawk.

Luan chhuahna hun hi Pu R.Laldinliana, Asst. Secretary, YMA Sub-Hqrs. Lunglei chuan Pathian hnenah a hlan a. Pu CMS Dawngliana, Vice President, YMA Sub-Hqrs. Lunglei chuan Home kaltlanga hnathawktute chu Krista rilru putu an ni a, an inpekna leh thawhrimna hi Mizoram hian a rah duhawm kan seng ngei a beisei thu a sawi.

Home te hnena thil pek hlanna hi Pu K.Lalhmingliana, Fin. Secretary, YMA Sub-Hqrs. Lunglei chuan kaihruaiin Pu K. Lalfakzuala, President, YMA Sub-Hqrs. Lunglei chuan YMA Day pual thil pek hi a hlan a, Home thlan bikte hnena thil pek hlannate chu:

TNT Lunglei Home, Theiriat

Bethel Centre, Sazaikawn

Rescue Centre, Pukpui Kawmzawl

Beiseina In, Pukpui Kawmzawl

Tv. K.Zodinsanga, Bethel Centre chu Pathian hnenah tawngtaiin YMA Day pual luan chhuah Programme tih tawp niin, thingpui in ho a ni.