02 Feb 2024: Vawiin chawhnu khan Bethesda Higher Secondary School buatsaihin an School Hall-ah Helping Hands Project Programme hman a ni.
Hetiang hun an buatsaih chhan hi Pu Lalnunsanga Principal Bethesda Higher Secondary School chuan sawiin, an sikul naupang thahnem tak zingah naupang 12-te chu an chhungten Vawk vulh hmanga an sikul kalna an tum sak a ni tiin heng sikul naupang 12-te tan hian Vawk Note a thlawna pek chu an hun buatsaih chhan a nih thu sawiin, Vawk Note chu an vulh chho zela an sikul kalna atana tangkaia an hman atan pe an nih thu a sawi.
He hun hmanpuitu Pu Chhawngchhuana Chongthu Zonet JB Editor chuan, tunlai sikul naupangte chu an vannei hle ni-a sawiin, hetiang hun Principal leh Staff-te’n an buatsaih sak chu an vannei hle niin a sawi. Zirlaite chu an thil tum a inang veklo thei a, hlawh tak tak neih tum kher leh nihna sang tak neih tum hi thil tha tak anih laiin eng kawng pawh zawh ila midangte tana tangkai leh an mamawh thawhchhuah dan ngaihtuah a, chu kan thawhhah atanga kan thawh hlawh hmanga mi pangngai anga khawsa thei tur leh mahni intodelh thei tura rilru neih a pawimawh a, sum ngah tum hmasa lova kan thawhchhuah atang zawka sum nei tura kawng dik zawh a pawimawh tih hre tur leh nungchang uluka tumruh turin Bethesda sikul naupangte chu a fuih a ni.
Pu Thanghmingliana Renthlei, MJA member pawhin fuihna thu sawiin, zir zawh hnuah sawrkar hna a thawh vek theih loh tih hriaa mahni kalna tur kawng thlan thiam a tul tih zirlaiten an hriat a pawimawh tiin, zirlai a mamawhtute tana Principal leh staff-te’n thil hlu tak an buatsaih sak chu chhuanawm a tih thu a sawi.
Vawiina he hun hmannaah hian Zirlai naupang mi 6 hnenah Principal chuan a ma Vawk Note paruk pein, a thawhhnihnaah zirlai 6 dang hnenah a pe leh dawn a ni.
