04 December 2023: Boruak ralmuang tak hnuaia Mizoram Assembly Inthlan vote chhiar zawh takah Zoram People’s Movement (ZPM) Party-in seat 27 la-in sawrkar thar an siam dawn.
ZPM candidate thlan tlin takte chu : W.Chhuanawma – Tuichang; Baryl Vanneihsangi – Aizawl South III; Lalchhuanthanga – Aizawl South II; Prof. Lalnilawma – Tawi; TBC.Lalvenchhunga – Aizawl West I; Dr Vanlalthlana – Aizawl North II; Lalnghinglova Hmar – Aizawl West II; Lalmuanpuia Punte – Hrangturzo; PC.Vanlalruata – Tuikum; K.Sapdanga – Aizawl North III; B.Lalchhanzova – Aizawl East II; Lalthansanga – Aizawl East I; Lalfamkima – Kolasib; Lalduhoma – Serchhip; VL.Zaithanzama – Aizawl West III; Vanlalhlana – Aizawl North I; H.Ginzalala – Champhai North; Lt-Col Clement Lalhmingthanga – Champhai South; V.Malsawmtluanga – Lunglei North; T.Lalhlimpuia – Lunglei West; Lalrinpuii – Lunglei East; Dr Lorrain Lalpekliana Chinzah – Lawngtlai East; C.Lalsawivunga – Aizawl South I; Lalramliana Papuia – Lunglei South; Jeje Lalpekhlua – Hnahthial; Lalbiakzama – Chalfilh; F.Rodingliana – Lengteng te an ni.
Thlan tlin zingah hian Pu Lalchhuanthanga, Dr. Vanlalthlana, Pu Lalduhoma, Pu VL.Zaithanzama, Pu Vanlalhlana leh Pu Lalsawivunga te chu MLA ni mek an ni a; Pu Lalthansanga pawh tunhma lama MLA lo ni tawh a ni a, midang 20-te chu MLA an nih vawi khatna a ni dawn a ni.
MNF party candidate 10 zinga tlingte chu : H.Lalzirliana – Mamit; Lalchhandama Ralte – Tuivawl; Ramthanmawia – East Tuipui; Rasik Mohan Chakma – Tuichawng; Robert Romawia Royte – Hachhek; Lalrintluanga Sailo – Dampa; Prova Chakma – West Tuipui; Lalrinsanga Ralte – Serlui leh K.Laldawngliana – Tuirial R.Rohmingliana – Thorang te an ni a. An zinga mi 7-te chu MLA ni mek an ni a, mi 3-te chu mi thar an ni.
BJP Candidate thlan tlinte chu Palak biala ding K.Hramo leh Siaha biala ding Dr K.Beichhua te an ni a. Congress Party candidate zingah Lawngtlai West biala ding MLA ni mek Pu C.Ngunlianchunga chauh a tling a ni.
Tun \um inthlanah hian hmeichhe candidate 18 an awm a, an zingah hian ZPM candidate Baryl Vanneihsangi leh Lalrinpuii te bakah MNF candidate Prova Chakma te thlan tlin an ni.
Sawrkar laia Minister zingah Pu Robert Romawia Royte leh Pu Lalchhandama Ralte te tih loh Minister dang zawngte chu Chief Minister Pu Zoramthanga leh Dy. Chief Minister Pu Tawnluia te bakah Dy. Speaker Pu H.Biakzauva te nen an tling zo ta lova. Chief Minister Pu Zoramthanga hian Aizawl East I-ah vote 8,626 a hmu a, Vote 10,727 hmutu ZMP Candidate Pu Lalthansanga chu vote 2,101-in a hneh lova. Dy. Chief Minister Pu Tawnluia’n a bial ngai Tuichangah vote 6,079 a hmu a, vote 6,988 hmutu ZPM candidate Pu W.Chhuanawma chu vote 909-in a hneh lova. Kolasib-ah ZPM Candidate Lalfamkima’n vote 8,657 hmuin bialtu MLA leh Minister ni mek Pu K.Lalrinliana, vote 7,488 hmutu chu vote 1169-in a hneh a. ZPM Chief Ministerial Candidate Pu Lalduhoma hian a dinna Serchhip bialah vote 8,314 hmuin amah hnaih bertu MNF Candidate Pu J.Malsawmzuala Vanchhawng chuan vote 5,332 a hmu a, an vote hmuh inthlauhna hi vote 2,982 a ni.
November ni 7-a vote thlak nî khan vote 80·66% a tla a. Mizoram-a vote nei zawng zawng hi mi 8,52,000 an ni a. Candidate 174 zinga 18 chu hmeichhia an ni.
Ruling party MNF, opposition Congress party leh ZPM te’n seat awm zawng zawng seat 40 an chuh vek a; BJP-in seat 23 an chuh a; seat 4 chuhtu Aam Admi Party leh Independent Candidate 25 zingah tling an awm lo.
Inthlan hnuhnung ber kum 2018-ah khan MNF Party chu hneh taka thlan tlin a ni a; seat 40-ah seat 26 an la a; ZPM-in seat 8 an la a; Congress Party-in seat 5, BJP-in seat 1 an la a ni.
BJP Mizoram chuan Assembly General Election 2023 Result puan zawh taka sorkarna siam tur ZPM Party-te chu an lawmpui thu an sawi a. Kalphung thar an intiam ang ngeia mipuite’n an hmuh theih nana hma an lak theih nan duhsakna an hlan a. Chutih rualin PM Scheme hrang hrang pawh a nihna ang taka hman anih theih nana hma la turin an ngen a, miretheite tana PM Scheme tam tak Mizorama sorkar tawh te’n an pawngsual thinte chu siam\ha a, a chhawr tur dik tak te’n an chhawr theih nana hma la turin an ngen a, Mizoram mipui rawngbawl hna tluang taka thawk turin duhsakna an hlan.
Hemi rual hian Mizoram BJP chuan an party official candidate MLA atana thlan tlin tak Dr K.Beichhua leh Pu K.Hrahmo te an lawmpui thu sawiin, Mizoram tan leh party tana theihtawp chhuah turin duhsakna an hlan a ni. (AIR, Aizawl))
