27 March 2025: Vawiin khan Lunglei District Bawrhsap Pi Navneet Mann hovin Lunglei DC Conference Hall-ah Healthy Lunglei District Campaign hnuaia inkai chhawn theih loh natna (non-communicable disease) laka him nana inzirtirna beihpui thlak mek thlirho niin, hmalak zui zel dan tur sawiho a ni.
He hunah hian Deputy Commissioner office, Health & Family Welfare leh Information & Public Relations official-te leh Mizoram Ṭhalai Kristian Pawl (MṬKP) Secretary te an tel a. Sub-Deputy Commissioner Pi Lalhlimpuii Pachuau, District Immunisation Officer Dr Christina Zonunmawii leh MṬKP Secretary Rev. F. Zorinkhuma te’n Healthy Lunglei District Campaign hnuaia hmun hrang hranga hriselna endikna leh inzirtirna kalpui dan report an pe a. Healthy Lunglei District Campaign-in a rah chhuahte sawiho niin, hmalak zel dan tura rawtna hrang hrang sawiho a ni bawk.
District Bawrhsap Pi Navneet Mann chuan nikum June thlaa Healthy Lunglei District Campaign kalpui a nih aṭanga hriselna lama a rah chhuah hmasawnna lo lang chu lawmawm a tih thu a sawi a ni.
Healthy Lunglei District Campaign hnuaiah hian kum 2024-2025 1st – 4th quarter chhungin kohhran ṭhalai, pawl (association) hrang hrang, sawrkar office hrang hrang zingah leh hun pawimawh hrang hrangah te NCD Awareness & Screening ṭum 39 buatsaih niin, mi 1,863 (mipa 903 leh hmeichhia 960) chu an hriselna dinhmun endik a ni a. He screening aṭang hian thisensang (hypertension) tih hriat chhuah thar 282 (mipa 165 leh hmeichhia 117) leh inhre sa endik nawn 112 (mipa 79 leh hmeichhia 33) an awm a. Zunthlum (diabetes mellitus) hriat chhuah thar 126 (mipa 73 leh hmeichhia 53) leh inhre sa endik nawn 82 (mipa 60 leh hmeichhia 22) an awm bawk.
Healthy Lunglei District Campaign hi Lungleia MLA ṭhahnem ngaite sum pek leh DC office aṭanga a ṭul anga sum sih chhuah bakah, health programme leh department dang programme hrang hrang nena kai kawpa kalpui chhoh niin, he campaign kalpui zelna atan hian nikum October thla khan Lunglei Deputy Commissioner office chuan RailTel Corporation of India Limited, New Delhi te nen Corporate Social Responsibility (CSR) kaltlanga ṭanpuina sum Rs Nuai 18.92 hmuhna tur inremna thuthlung (memorandum of understanding) an ziak a, 1st instalment dawn tawh a ni. (DIPR)
