23 Nov 2023: Kum 2025-ah India ram atanga TB umbo tum anih avangin TB programme hnathawhte endik turin Central Team ten Mizoram an rawn tlawh.
Vawiin khan Ministry of Health & Family Welfare Central TB Division atanga Joint Supportive Supervisory Mission lo kalte leh state official-ten Dte of Health Services Aizawl Dintharah an inkawm.
He meeting hi NHM Mission Director Dr. Eric Zomawian kaihruaiin LAD department leh MSACS aiawh te, State Programme Manager NHM leh NHM lama State Nodal Officer-te an tel a ni.
Central team hian Aizawl khaw chhunga Private Hospital hrang hrang leh Laboratory te, District TB Centre Falkawn leh Health and Wellness Centre te an tlawh a. Lunglei district an tlawh bawk.
He hunah State TB Cell report-in a tarlan danin, kumin January atanga October thla thlenga TB rinhlelh test zawng zawng hi mi 12,309 a ni a, TB vei hmuh chhuah chu mi 1,929 a ni. Heng zingah hian MDR TB vei 122 hmuh chhuah an ni a, MDR-TB vei tihdam zat 70% a ni.
Tarlan theih chinah kumin Jan – June thla thlenga TB vanga thi zat hi mi 62 an ni tawh a. TB tihdam zat chu 83% a ni. TB leh HIV vei kawp chu 12% a ni. (AIR Aizawl)
