09 Sept 2025: Women & Child Development, Social Welfare, Women and Child Development Department leh Central Adoption Resource Agency (CARA) tangkawp chuan Aizawl Hotel Regency-ah Fa lak dan tur chungchanga hriattur pawimawh inzirtirna – “State Level Orientation and Training Programme on Adoption Regulations, 2022” chu vawiin chhun khan buatsaihin Pi Lalrinpuii, Social Welfare, Women & Child Development Department (SW, W&CDD) Minister chuan khuallian niin a hawng a.
Pi Lalrinpuii chuan, dan ang taka fa lak chu naupang leh a latu, nu leh pa te tan nakin zelah pawh a him thu sawiin hemi chungchang hi midangte hrilhhretu leh zirtirtu a lo tang zel turin kalkhawmte chu a ngen a. Adopt ngaia naupang siam thintu lian tak, nupa inthenna leh chhungkaw kehchhia hi tih tlem dan tur ngaihtuah hova naupang tana tuarna rapthlak zia lo inhrilhhria a, awareness nasa taka lo kalpui thin turin kalkhawmte chu a chah bawk.
Kum 2005 atanga August 2025 thleng khan dan ang taka fa lak (adopted children) 572 awm tawhin tun dinhmunah adoption nghak mek nu leh pa 36 an awm a. Dan ang taka fa lak theih (Legally Free) 19 awm mekin dan anga lak theih tura buaipui mek 11 an awm a ni.
He training-ah hian District tin District Magistrate (DM), Chief Medical Officer (CMO), State Adoption Resource Agency (SARA), District Child Protection Unit (DCPU), Child Welfare Committee (CwC), Specialised Adoption Agency (SAA) leh Children’s Home aiawh te an tel a, mithiam sawm bikte’n zirtirna an pe a ni. (DIPR)
