” ‘A hmasa berah Mizoram’ tih rilru pu chungin hna kan thawk dawn” – CM Pu Lalduhoma
15 Aug 2024: India ramin zalenna a hmuh champha 78th Independence Day chu Mizoram-ah a lawmna pui ber Aizawl AR Lammualah hman a ni a. Chief Minister Pu Lalduhoma chu khuallian a ni a, hnam puanzar pawt pharhin parade contingent 27 te chibai bukna a chhanglet.
Hemi zawh hian thusawiin, zalenna champha lawmnaa kal khawm mipuite, Mizoram leh khawvel hmun danga cheng Zofa zawng zawngte duhsakna chibai bukin, Mizoramin hmasawnna hmel thar a hmuh theih nana thawhpuiah a sawm a. India ramin zalenna a hmuh theih nana beitute zahna chibai a buk bawk.
A kaihhruai sawrkarah rinna an nghah avangin mipuite chungah lawmthu a sawi a. Mipuite beisei ang ngeiin “A hmasa berah Mizoram” tih rilru pu chungin hna kan thawk dawn a, thla riat vel chauh sawrkar kan kaihhruai chhung hian thil inthlakthleng tam tak a awm tawh a ni, a ti. Mizoram sum leh pai dinhmun sawh ngheta siam tha turin hma kan la nghal a, chutihrualin a nghet lova kum tam tak sawrkara lo thawk tawh te dahnghehna tur ruahmanna pawh siam a ni. Ni za chhunga kan tihtur kan tarlan Chief Minister’s 100 Days Programme chu tha takin kan hlen a, thlai thar leina tur budget-ah kan dah a, a lei dan ngaihtuaha bawh zuitu tur Agricultural Market Assurance Fund Management Board kan din a. Sum leh pai daihzai taka hmang tur leh inrenchemna fel taka kan kalpui theih nan Resource Mobilization Committee kan din a, sawrkar policy tha taka a kal theih nan leh hnathawktute inkara inthlunzawmna tha siamtu tur Mizoram State Policy Coordination Committee kan din a, hnathawh tinreng endika hnai taka vil tlattu tur Project Monitoring Committee kan din bawk. Heng board leh committee te hian hna pawh an thawk nasa tawh hle a ni, a ti.
Chief Minister Pu Lalduhoma chaun, hun rei tak atanga lo tling khawm tawh Power leina bill ba Rs. Vbch 448 kan pe a, a hun taka bill kan pek zui tak avangin, pek tlai vanga chawi belh tur (surcharge) Rs. Nuai 58 kan hum a, hamthatna (rebate) Rs. Nuai 35.25 kan hmu let ta zawk hial a ni, a ti. Hun engemawchen sawrkarin a lo bat sak tawh Health Care Bill tang Rs. Vbch 50 chu kan pe chhuak a, hun rei tak atanga lo tling khawm tawh pension sum ba Rs. Vbch 256.75 kan pe chhuak tiin, Sawrkar hnathawk hlawh atan thla tin Rs. Vbch 330 vel leh pension atan Rs. Vbch 82 vel pek chhuah thin a ni, a ti.
