John F Kennedy chuan January 20, 1961 atanga November 22, 1963 chhunga USA President 35-na nia ram hruaitu ber a nih chhung reilote-ah khan nasa takin hna a thawk hman a. Kum thum chhung vel chauh President dinhmun a luah chhungah khan America mipuite tana hriatreng tlak thil tha tak tak a ti hman bawk a ni. Chung a hnathawh zinga pawimawh ber pakhat chu Politician phena awm reng thin Syndicate ho chhutchhiat a tum kha a niin, kum 1963-a kahhlum a nih chhan pawh kha a ni ngei e chu tih ngam ni chiah lo mahsela heng mi ho rawih hi nia rinna lian tak neih a ni.
Syndicate ho hi Major League emaw Underworld emaw Mafia tiin emaw an sawi bawk thin a, langsar taka che an nih si loh avangin an hming pawh hi sawi dan chi hrang hrang a awm bawk thin. Kum 1920 daih tawhah khan USA-ah chuan an Constitution siamthat vawi 18-na hmangin ram pumah Zu khap a ni a, amaherawhchu khap ni mahsela Mizoram ang deuh bawk hian a ruka zuar ‘Bootlegger’ an tih chu an tam em em reng tho. Hun a rawn rei deuh takah phei chuan Zu zuar vengtu an tih Mafia ho chu an rawn piang chhuak ta hial a ni. Anni chuan silai nen khawpui lian deuh deuhah chuan Club neiin an enkawl a, Sorkar lam atangin theihtawpa tihrem tuma beih ni thin mahsela rawva taka an chet thin avangin leh Sorkar lam mi leh sa thurualpui an neih that bawk avangte chuan tihngaihna vak an awm thin lo. Kum 1929 February 14 nî-ah phei chuan anni ho vang hian Chicago khawpuiah silai a puak hial a; Lincoln Park-a mipui punkhawmna hmunah chuan zing lam dar 10:30-ah hian silai keng mi palite chuan mipui lam hawiin Thompson submachine pahnih leh shotgun silai pahnihte chu an rawn kâp chiam a, an zinga mi pahnihte phei chuan Police Officer thuamin an inthuam lehnghal a. Mi pali an boral nghal nghe nghe a nih kha.
Hetih hunlai hian misual hotu lar ber mai chu Al Capone a ni a, hming lemah Scarface tia koh thin a ni a, gang star a nih mai bakah business mi a ni bawk. Misual fing tak a niin, ho tam tak a nei reng thin a; tun hnuah hian ama chanchin film pawh engemawzat siam a ni nghe nghe. Anni chuan theihtawpin an bei zel a, Zu khapna hlih theihna turin an nawr zel avang chuan 1933 Febuary thla a lo thlen meuh chuan dàn siamthat a lo ni ta hialin, chu an dàn siamthat chu Utah State chuan December 5, 1933-ah an pawm (ratify)-in, State dangte pawh chuan an pawm chho zel a, a pawm tlai ber chuan 1966-ah pawmin, USA ram pumah chuan Zu thlah zalen chu pawm a lo niin, ram pumah Zu chu a lo zalen leh ta a ni. Mafia-te hi Zu chungchangah chauh an hnawk lo a, sumdawnna kawngah leh politics lamah ngei pawh hnuhma an rawn nei chho zel a, John F Kennedy phei chuan chhutchhiat tumin hma a la nasa viau a ni kha. A unaupa Robert F Kennedy chu America Sorkar dàn lama thuneihna sâng ber chelhtu, Attorney General-ah a dah sauh sauh a, thih huamin an han bei tak tak a nih kha. November 22, 1963 chawhnu dar 12:30-a Dallas hmuna Lee Harvey Oswald-a’n ral hla tak atanga a rawn kah chhan pawh kha chiang taka hriat theih ni tawhlo mahsela vawiin thleng hian hetiang Syndicate ho vang hi a nih ring an la tam a ni.
Hetianga dàn pawna che thinte hian politics chhungah kua an hreuh a, Politician tam tak an hminin hmanrua atan an hmang a. Sumdawnna leh Contract/Supply thawhna leh Sorkar atanga hna awm reng reng hi an kutah vek a awm emaw tih mai tur a ni. An hmalakna hi a len tham em avangin tu tan mah han dodal ngamna chi a ni lo a, an kawnga ding ngam an awmlo a ni ber mai. Anmahni lah chu danglamna engmah awm lo-in suit nalh tak nen an inchei a, midang angin Biakinah an inkhawm ve tho a, an fate leh midang fate pawhin nitin school pakhatah zirlai an zir tlàn zel tho avangin hriat hran an har a, man chhuah an har em em thin. Robert F Kennedy ngei pawh chuan mawhphurhna sâng a han chelh phat chuan Ukil an mamawh thu advertise a chhuah nghalin; Ukil huaisen, dikna ngaina mi leh rinhlelh rual loh tur mi 53 te chu an han la a. Chumi hnuah chuan an ram chhunga CID anga thawk chi pawl hrang hrangte nen thawhhona tha tak an siam a. Chutianga theihtawpa an beih chuan Syndicate ho, a ruk a râla che thinte chu mi 600 lai an chanchin an han chhinchhiah thei ta hial a ni. Chung an mi mante chu an enthla zel a, an nungchang an sim loh avang chuan an han man ta chat chat mai a, an mi rin loh tak tak te chu lungina khung tura an han man meuh chuan mipui mak tih a tling hial a, an fate phei chu an mak ti leh hrehawm ti chu an tap rawng rawng hial a ni.
Hetianga an hmalakna hun hi rei bei hman lo-in reilote chhung ni mahsela America Sorkar chuan an ziaawm phah viauin an hria a, amaherawhchu chutianga misualho dodal chhunzawm zeltu an awm tak loh avang chuan an harsatna bawk chuan vawiin thleng hian a la chim ta reng a, Presidential Election-ah ngat phei chuan Campaign Fund thawhtu-ah te hial an tang thin a sawi a ni. Sum leh pai an neih miau avangin politician-te an thunun a, an hnuaiah ram hruaitu an lo awm tak avangin an ram chu an duh dan ang angin an kaihruai ta mai thin a ni. Chutiang chuan America ram chauh an awm lo a, India ram ngei pawh hian chutiang harsatna khurah a luhna a rei tawh nia sawi a niin; kan ram, Mizoram ngei pawh hun rei tawh tak atang khan hetiang hian min lo chim reng tawh nia sawi a ni bawk.
Ram hruaitute kut phuar a nih chhante, kan beisei loh ang taka thil an tih leh thinna chhan zawng zawng hi hetianga a phena thil awm avang hian a ni lo ang tih hi sawi har tak a ni. An campaign laia an tawng huai anga an tlin hnua an chet leh ngam lohna chhan tam tak te hi ngaihtuah tham a ni hial bawk àwm e. Kristian kan nihna angin midang tana pawi tur erawh an khawih lo a ni maithei e, amaherawhchu kum 1972 atanga mahnia ro kan inrelna atang tawha vawiin thlenga kan ram roreltute’n an hunlai theuha mipui tana rawngbawlna an neih tawhah te hian kan dam zawh loh chhan te hi engvangnge ni ang le? Kum tam tak kal tawh atanga America Sorkar hruaitu politician phena Syndicate ho awm ang hian thil awm hi a awm a ni ve mai lo ang maw ?
