26 March 2025: Vawiin tlai lam dar 4:00 khan Chief Secretary Conference Hall MINECO Aizawlah Vigilance Department leh ACB ten ACB hnathawh dan leh an hmachhawp mek te thlirhona Chief Secretary cum Chief Vigilance Officer ni bawk Pu Khilli Ram Meena, IAS hovin an nei. He hunah hian ACB Director Pu J.Lalthafamkima MPS chuan ACB hnathawh dan Power Point Presentation hmangin a tarlang a ni.
ACB Director tarlan danin tun din hmunah ACB-ah hian hnathawk 67 an awm mek a, chung zinga mi 11 te chu Corruption case chhui thei (Police Inspector leh a chunglam) an ni a. ACB hian tun dinhmunah Criminal Regular Case ziahluh leh chhui mek 15 an nei a. Preliminary Enquiry tih mek 11 a awm bawk. ACB a case ziahluh tam ber te hi Aizawl District leh Lawngtlai District atanga case lutte an ni a. Case ziahluh zinga tam ber chu sorkar sum hman dikloh ( mis-appropriation of govt funds) leh sorkar sum a hmanna tur ni lova hman (Criminal mis-conduct) an ni.
Chief Secretary cum Chief Vigilance Officer chuan ACB leh Vigilance officer te chu corruption kaihhnawih dan leh hraite chu nasa leh zuala zir chiang tur leh hrechiang lehzual turin a fuih a. Sorkar hnathawk eirukna (corruption) kaihhnawih case neite chu danin a phut ang taka kalpui zel thin turin a hrilh bawk.
