July 9, 2024 : PC Party President Pu Vanlalruata’n, ZPM kaihhruai sorkara Adviser to CM mi 5 ruat chu Danpui kalh anih bakah mipui sum khawhralna a ni a ti a, hemi chungchang hi vawiin khan Larsap leh ZPM Val Upa Council hnenah an thlen.
PC Party-te’n lehkha an thehluh chungchang sawiin, PC Party President Pu Vanlalruata chuan, Minister ngah lutuk chu tul lova mipui sum khawhralna nia sawrkar laipuiin a ngaih avangin kum 2003 khan Mizoramin minister a neih theih zat chu 12 aia tam lovah a dah niin a sawi a, tuna Adviser to CM panga an awm avanga mipui sum senral belh tur chu Rs Nuai 845 chuang niin an chhut a, tun term hi an hmang tluan anih chuan hei aia tam fe hi an sengral dawn niin a sawi. Heti zat mipui sum khawhral thlawnna tur, Danpui kalh ni bawk chu tihtawp nghal a tul avangin PC Party chuan Larsap leh ZPM VUC hnenah thu an thlen ta tih a sawi.
Pu Vanlalruata chuan, hetiang kalphung phuahchawp hmanga hmalakna chu mipui bakah Court pawhin a ngaimawh hle niin a sawi a, kum 2008-a Mizorama Parliamentary secretary pasarih ruatte pawh Court-in a lo paihtir vek tawh a ti a, tuna an lehkha thehluh chu Larsap chuan dan anga hma a lak ngei an beisei tih a sawi bawk. (DD)
