Behliang leh Nihawi chi lei sak dawn

14 Nov 2026: District Agriculture Office Lungleia thawktute chuan vawiin khan Zawlpuia an hmalaknate an tlawh.

Sawrkar laipui hmalakna kaltlangin Zawlpui khuaah hian District Agriculture Office Lunglei chuan loneitu chhungkaw panga te hnenah  Behliang chi leh Nihawi chi te a thlawna semin, loneitute hmalakna hi vawiin khan an tlawh a. Behliang leh Nihawi chingtute hian an thlai chin chu an vawikhat chinna leh a enkawltu department lam tan pawh an vawikhat hmalakna ve tho anih avangin chinchang hre lutuk lo va hma la an nih thu an sawi. Hetihlai karah hian thlai eichhetu Pangang avanga harsatna an tawh thu sawi bawkin, Department lamin pangang kahna tur a pekte pawh an thlai chinte sang tak tak an nih avang leh mihring tan tur hi a hlauhawm bawk si avangin hman a remchang lo hle niin an sawi a, hetiang anih avang hian an thar tur beisei aia tlem fe an thar dawn nia an hriat thu an sawi.

Loneitute hian an mahni tlawhtu department-a thawktute hi an harsatnate lo hrilhin, heng harsatna an neihte hi a theih ang anga sutkian dan ngaihtuah an tum thu thawktute hian hrilhin, Sawrkar hmalakna ti hlawhtling tura theihtawp an chhuahna chu fakawm an tih thu an sawi.

Nihawi leh Behliang chingtute hian loneitute hlawhtling lehzual zawka hmalak chhunzawm anih theih nan loneitute leh department lam thawktute pawhin mumal zawka training neih nise an duh thu a hmuna kal kan palai an hrilh a ni.

Agriculture Department chuan heng loneitute thar chhuah behliang hi kg-ah Rs 84.50 leh nihawi chi kg-ah Rs 83.43 zelin an lei sak dawn tih an sawi a, beisei ang chuan belhiang hi ni 150 atanga ni 200 inkarah hralh theih tura beisei niin, nihawi hi ni 90 atanga ni 120 velah hralh theih tura beisei a ni.

Zawlpuia heng thlai chingtu chhungkuate hian tin 3 hmun atanga tin 5 hmun velah hma an la tlangpui a ni.