Tlawng lui khuahin KM 1 aia thui chim tawh

06 Nov 2026: Vawiin khan  Lunglei District Consumers Association (LDCA) hruaituten tunlaia tuisem dan chungchangah PHE Deptt hotute an hmu.  PHE lam chuan Er.Lalsanga SE hovin EE leh SDO telin LDCA hruaitute hi an lo dawng sawng a. PHE hotute  chuan  Lungleiin Tui hnianghnar neih theihna atana LDCA-te hma lo lak tawhnaah  lawmthu an sawi a, tunah hian Tlawng lui khuah chuan KM 1 aia thui a chim tawh thu an sawi.

Hun rei tak atangin Lungleiah mipuite hnenah Connection pakhatah tui litre1300 sem thin a ni a, hei aia tam hian sem theih a ni tawh angem tiin LDCA hruaitute chuan PHE hotute hnenah an thlen a. Department lam chuan theih tawp an chhuah mek thu leh tuna litre 1300 an sem aia hmasawn an lo tum tur thu an sawi a ni.

Tunah hian SASCI sum hmangin Lunglei Tui làkna tih hmasawn mek a ni a. Kum thar February 2027 hian Chief Minister hawn tir an tum thu PHE hotute chuan sawiin, hemi hnulam atang phei  chuan tui lamah Lunglei chuan hmasawnna hmel a hmuh ngei tur thu an sawi a ni.