Operation Peace Christmas & New Year kalpui tum

05 Nov 2026: Vawiin khan Home Minister Pu K Sapdanga hoin Krismas leh Kumthar vuakveta boruak ṭha a awm theihna tur te, zu leh ruihhlo do dan tur chungchangte leh hunpui muanawm taka kalpui a nih theih dan tur sawiho a ni. He hunah hian Excise and Narcotics Minister Pu Lalnghinglova Hmar pawh telin Home Department, Excise and Narcotics Department, Aizawl Municipal Corporation, Aizawl DC leh Central YMA aiawhte an tel.

Home Minister chuan, “Mizote hunpui kan lo thleng leh dâwn ta a, boruak muanawm tak kan neih theihna turin ṭan rual a ngai a, kan ṭan rual chuan thil ṭha zawk a chhuak thei ang. Vawiinah Police, Excise, CYMA, DC leh AMC aiawhte kan kal khawm a, kan zavaia thawhhona hian rah ṭha a chhuah ngei ang,” a ti.

Pu Lalnghinglova Hmar chuan tun hnaia Mizorama ruihhlo dona kawnga ṭan rualnain rah ṭha a chhuah thu a sawi a, Operation Trident avangin ruihhlo zuar liante man chhuah an nih avangin lawmthu a sawi a, official report-a lang lo he operation-a Excise and Narcotics Department hnathawh dante report a pe bawk.

Mizoram Police chuan Operation Peace Christmas & New Year kalpui an tum thu IGP Pu H Ramthengliana’n a sawi a, hunpui laia duty tura ruahmanna an siamte a report bakah Operation Jericoh 2 kalpui a nih thu a sawi lang a; Aizawl SP Pu Zosangliana’n Aizawl khawpui chu Zone 4-ah ṭhena Sector 18-a duty tura ruahmanna an siam dante a report bawk.

Excise and Narcotics Commissioner Pu Z Lalhmangaiha chuan hunpui laiin an Department-ah chawlh (leave) lâk an khap thu leh, tuna hnathawk lai bakah training mekte nena thawk chhuak tura ruahmanna an siam thu a sawi.

Central YMA lam chuan sorkar ruahmanna awm apiang an thlawp theih thu te, ruihhlo ngai Aizawl khawpui lunlaia pungkhawm ṭhin hnawh darh bakah a ṭul anga ruihhlo ngai enkawlna hmunah (rehabilitation home) dah an tum thute an sawi a, kum hmasa lama Police leh Excise Department-te nena an thawh hona chhunzawm zel ṭha an tih thute an sawi a; ruihhlo dotu Zonal Anti Drugs Squad Bakah branch YMA lamin ṭan lâk an tum thu an sawi.

Aizawl Municipal Corporation lamin Aizawl khawpui neitu an nih angin a ṭul apianga chet chhuah an inhuam thu sawiin AMC hminga tih ve theih a awm chuan an inpeih reng thu an sawi.

He meeting hian khawpui hmun lunlai leh pawimawh bikte chu tun aṭanga chhun zan zawma ven uluk a ṭhu thu te, Winter Festival vuakveta himna ngaih pawimawh a ṭul thute an sawi a, hma latu tur an din bawk.