“Democracy rah behin a awm mek”  – MPCC Sr.Vice President

05 Nov 2026: Vawiin chhun dar 12:00 khan Lunglei Press Club-ah MPCC Sr. Vice President Pu Lalnunmawia Chuaungo chuan thuthar thehdarhtute a kawm a, MPCC Vice President pahnih Pu Zodintluanga Ralte leh Pu Ngunlianchunga MLA-te’n an tawiawm.

Pu Nunmawia chuan India ramah nasa takin Democracy rah behin a awm mek a, mitinin zalenna kan neih vote nasa taka tih chingpen a ni a, Election Commission leh Supreme Court hial pawh Vote tih chingpen kawngah hian an inrawlh a ni, a ti.

Tuna Chief Election Commissioner Gyanesh Kumar phei chu a thawhpuite pawh palzut a thil ti a ni tiin, Journalist-te’n nasa taka an chhui hnuah Vote tih chingpen hi a dik tih mipuite’n an hre ve ta zel a, chuvangin CEC; Gyanesh Kumar chu bang turin nasa takin mipuiin an nawr a, Congress Party pawhin hemi chungchang hi kan tlangau pui a ni Pu Nunmawia chuan a ti a. Tunhnaia India ram State thenkhat inthlana BJP sawrkarin an duhna State-ah Vote nuai tel an paih laiin a thenah awihawm loh khawpin vote an ti pung a, BJP a chak reng theihna tur ngaihtuahin hma an la a, chumi atana an hmanruaah chuab Gyanesh Kumar hi an hmang niin a sawi. Hetiang renga BJP hi a kal chuan an duh chen chen an lal anga Democracy a tla chhe dawn tih hi Congress Party ngaihdan a ni a, mipuite’n kan zalenna kan neih let leh a, Democracy kaihthawh anih leh theih nan Congress Party chuan hma a la zel dawn a ti.

MPCC Sr. Vice President chuan, Mizoram State University pawh a awm hmaa thawktu Group D lak a ni ringawt chu zialo a tih thu leh ZPM tih awm tawk nia a hriat thu a sawi a, hetihlai hian tar pension hlawh kuminah vawikhatmah an la pe lo thung a, Central atangin pawisa an la dawng lo tih an chhuan lam a. Central-in a tum ve tur an hmu lo anih pawhin Mizoram sawrkarin a tum ve tur an intiamna kha pe mai se la, hetianga Tar pension an pe duh lo hi upa-te an ngaihthah zia lanna anih avangin kumin January atanga October thleng pension hlawh an pek loh hi pe vat se tih hi kan ngenna a ni a ti.

Health Care chungchangah ZPM sawrkarin phai lam Damdawi In te a duhsak lutuk chu thil pawi tak anih thu leh Mizorama Private Damdawi In tha tak takte nen pawh inrem dan zawng tura a duh thu Pu Lalnunmawia Chuaungo chuan a sawi bawk.