Fimkhur zawka document pawimawh pek chhuah thin ni se an ti

04 Nov 2026: Nimin khan YMA Sub-Hqrs Lunglei Hruaitute leh Village Council leh Local Council Association hruaitute YMA Office, Venglai, Lungleiah inkawmin, tun dinhmunah Sawrkarin khua leh tuite hnena Residential leh Tribal Certificate a pek chhuah dawna LC/VC leh YMA-te’n hriatpuina an pek chungchangah rualkhai zawka hma an lak theih dan tur an sawi ho.

Joint meeting chuan fimkhur leh uluk zawka document pawimawh Tribal Certificate leh Residential Certificate lak chhuah nana hriatpuina pek thin chu pek chhuah thin nise an ti a. Tribal & Residential Certificate la turte hriatpuina pawh Format YMA leh LC/VC ten inangtlang hman anih theih nan hmalak ni se an ti a, District thuneitute nen pawh sawiho tha an ti bawk.

In hmun leh ram hralh chungchangah kan Ram leh Hnam humhalh nan bakah chhan hrang hrang avanga  kan fimkhur a ngaih tak avangin VC/LC leh YMA-te hriatpui ngeia in lei/hralh tura mipuite hnenah ngenna siam tha an ti bawk.

Ram leh Hnam tana thawhhona chungchang pawh sawiin Jt. Meeting chuan, ruihhlo dona, foreigner chungchang, hnam dang lirthei lei tirah te lungrual zawka tan tlan tul an ti a. District level bakah Khua/Veng-ah VC/LC leh YMA te lungrual taka thawhhona tha neih zel tha an ti bawk.

Nimin Jt.Meeting-ah hian YMA Sub-Hqrs Lunglei aiawhin Office Bearers leh VC/LC Association aiawhin an Office Bearers te an thukhawm a ni.