LMC Vice Chairman-in banna a thehlut ta

02 Nov 2026: Lunglei Municipal Council (LMC) Vice Chairman Pu K.Lalrinawma chuan vawiin tlai dar 3:00 khan LMC Vice Chairman a nihna atangin Chairman Pu Lalzuithanga hnenah banna a thehlut.

Pu K.Lalrinawma chuan Party lama kan hotute nen thil kan sawiho hnuah tun dinhmun hi kan thleng a, kan Party chuan chanvo insemzai hi kan thupui a ni tiin, a aiawhtu tur amah aia tha zawk an awm thu sawi bawkin, LMC Vice Chairman hna a chelh chhunga Chairman leh thawktu dangte nen thawhhona tha tak an neih avanga lawmawm a tih thu a sawi bawk.

Hetianga LMC lama a chanvo a kalsan chungchangah hian boruak tha tak hnuaia thil ti an nih thu Pu Awmte a chuan a sawi a, bialtu MLA leh Party hruaitute chungah pawh a lawm thu a sawi a ni.

LMC a mawhphurhna a chelh ve chhunga Project hrang hrang an kalpuite a par chhuak ve dawn hnai ta te pawh lawmawm a tih thu a tarlang bawk a, a mimal chanvo bikah Local Council hruaitute nen Lunglei tan tha taka an thawhho thin avangte, NGO te nen bakah Zirlai pawlte leh MJA-te nen thawhhona tha tak an nei theite, lirthei neitu pawl hrang hrang nen thawhhona tha an neih avangte pawhin Pu Awmtea lawmthu a sawi a, Sawrkar Department hrang hrang nen tha taka an thawho thin avang pawhin lawmthu a sawi.

LMC Vice Chairman a nih chhunga Pathian kaihhruaina avanga thuneihna hman sual emaw sum chheprel emaw a neih loh avanga te leh a phak tawkah tihsual lian lutuk a neih loh avangte pawhin Pu K.Lalrinawma hian lawmawm a tih thu a tarlang bawk.

Chanchinbumi te zawhna chhangin Vice Chairman thar tur chu LMC Chairman leh Party hotuten an la sawiho turah angai tih a sawi.

He hunah hian Pu Lalramliana MLA, ZPM Southern Hqrs President chuan tunhnaiah Party kan insingsa a, kan hotuten Party lamah kan insawh ngheh phawt an ngaipawimawh hmasa a. Chutiang anih avang chuan kan hotute zing a mi Pu K.Lalrinawma pawh Party-ah mawhphurhna pawimawh tak nei se an duh a amah pawhin an beisei ang taka thahnemngai zawka Party a thawh a duh avangin nihna a chelh te pawh insingsak tha a tih avangin hetiang thil hi a ti ta a, kan hotute duhdan pawh a ni a ti.

Vawiina LMC Vice Chairman in a hna atanga banna a thehluh puala inkhawm tawi BoC Conference Hall a neihah hian ZPM Southern Hqrs Lunglei hruaitute bakah Pu K.Lalrinawma awmna Chanmari Veng ZPM hruaitute leh Ward Committee member-te bakah MJA Member thenkhatte an tel a ni.