Nature Film Festival-ah Mizoram chu Focus State-ah puang

29 Oct 2026: Rain International Nature Film Festival vawi 8-na, Kochi, Kerala-a neihah vawiin khan Information, Public Relations, Printing & Stationery (IPRP&S) Minister Pu B.Lalchhanzova chu khuallian a ni.

Pu B Lalchhanzova chuan sik leh sa, thing leh mau, ramngaw hlutzia leh humhalh a tulzia inzirtirna lam hawi film festival buatsaihah Mizoram film maker te sawm an ni chu lawmawm a tih thu a sawi a; Mizoram aiawha tel film maker ten Mizoram mawizia phochhuahna hun remchang atan leh hmasawnna tur ngaihtuahna thar puak chhuahna hun atan an hman tangkai a beisei thu a sawi. Khawvel sik leh sa inher danglam danglam zelah, kan ram ngaw, thing leh mau, ramsa te a chereu nasa a; he kan chenna khawvel hi a chhiat zel lohna turin thangtharte inzirtir kan mamawh a, film hi mi thinlunga thusawina hmanraw tha ber te zinga mi a nih angin Environmental awareness atana film hman tangkai nachang hria Jayaraj Foundation chu Minister hian a fak a ni.

Mizoram leh Kerala chu inhlat taka awm ni mahse kan khawsak phung leh thil thlir dan, a bik takin zirna lamah te, rinna thuah te, khawtlanga inpumkhatna kan neih danah te inanna tam tak kan nei, Pu B Lalchhanzova chuan a ti a. Kerala chu hun rei tak atang tawha tlawh a lo chak thu leh, he film festival festival hmang hian kan filmmaker te nen, culture leh film hmanga Kerala leh Mizoram mipuiten inkungkaihna tha zawk an neih ngei a beisei thu a sawi bawk.

Sik leh sa leh environment lam hawi he Film Festival hi Keralam film maker lar leh National Film Awards Jury Chairman pawh lo ni tawh Shri Jayaraj buatsaih niin SCMS School of Technology & Management hmunah neih a ni a, October ni 31 thleng a awh ang. He Film Festival hi United Nations Convention to Combat Desertification pawhin a hriatpui a; NFDC, Jayaraj Foundation, Kerala State Chalchitra Academy bakah pawl engemawzatin hriatpuiin an sponsor a ni.

8th Rain International Nature Film Festival ah hian Mizoram chu Focus State a puan niin Mizoram atangin Film 4 chu Festival neih chhungin tihchhuah (screen) a ni dawn a. A hawnna programme Minister hoa neihah hian Bangalore Mizo Association (BMA) member mi 10 ten Mizo hnam lam an entir a, mipui lawm a hlawh hle.

Mizoram aiawhin Pu Pratap Chhetri, Jt Director I & PR; Pu Remlalliana Hnamte, PS to IPRP&S Minister bakah film maker pathum – Napoleon RZ Thanga, Lalruatfela leh K Lalrinzuala te an tel a ni.