MEC-ah Mizo naupang tam zawkin seat an chan theih beisei

28 Oct 2026: Higher & Technical Education Department hmalakna chungchangah vawiin khan Minister Dr Vanlalthlana chuan a pisaah press conference a ko a. Mizoram Engineering College (MEC), Pukpui, Lunglei chungchang sawiin, degree course pahnih (2) Civil Engineering (30 intake per year) leh Computer Science Engineering (30 intake per year) te class tan phalna chu All India Council for Technical Education (AICTE) atangin hmuh a ni tawh a ti.

MEC atan hian post 80 create tawh niin post 32 hnawh khah phalna kan nei tawh a, Principal leh zirtirtu lakna tur hi MPSC ah a awm mek a, Building te pawh chei that mek niin a kal kawng (approach road) te, tui supply-na tur te, electric supply-na tur te leh a tul dangte buaipui chhoh mek a ni, a ti.

Kum 2026-2027 academic session-a tan tum ni mahse kan inpeih hman loh deuh avangin kum 2027-2028 academic session atanga tan tum zawk ani leh ta a ni, a ti.

Minister chuan, MEC hi kan tan hunah chuan 50% seat hi All India Entrance (JEE) atanga pek chhuah ani anga, 50% dang chu State Entrance (SMATEE) atanga pek chhuah a ni ang, tiin hetiang hi a nih chuan mizo naupang tam zawkin seat an chan theih ngei beisei a ni, a ti.

Mizoram State University chungchang sawiin, MZSU dinna tur hian VC leh Registrar lak tum a nih laiin nominee zing ami a inhnuhdawn avangin Search Committee din thar leh a ni a. Tunah hian VC leh Registrar la tura hma lak leh mek a ni, a ti a. MZSU atan hian post 71 create a ni tawhin post 21 lak phalna neih a ni tawh a, tunah hian thenkhat lak ni tawhin a dang pawh lak mek an ni a, Lunglei-a building luah tur kan neih fel hnuah chak lehzual a hma lak a ni ang, a ti.